కొంతకాలం క్రితం కేన్సర్ వ్యాధి నుంచి కోలుకున్న హీరోయిన్ మమతా మోహన్ దాస్‌కు ఇపుడు మరో అరుదైన వ్యాధి సోకింది. జూనియర్ ఎన్టీఆర్ నటించిన "యమదొంగ" చిత్రంలో ఆమె ప్రత్యేక పాత్రను పోషించి మంచి గుర్తింపు తెచ్చుకున్నారు. ఆ తర్వాత ఆమెకు వరుస ఆఫర్లు వచ్చాయి. దీంతో కొంతకాలం పాటు ఆమె తెలుగు చిత్ర పరిశ్రమలో కొనసాగారు. ఆ తర్వాత ఆమె కేన్సర్ బారినపడ్డారు. ఈ వ్యాధికి ఆమె చికిత్స తీసుకోవడంతో ఆమె కోలుకున్నారు. ప్రస్తుతం పోషకాహార నిపుణురాలిగా సోషల్ మీడియాలో ఎంతో మందికి దిశానిర్దేశం చేస్తున్నారు.
ఈ నేపథ్యంలో తాను అరుదైన వ్యాధితో బాధపడుతున్నట్టు ఆమె చేసిన ఓ ట్వీట్ అభిమానులను షాక్‌కు గురిచేసింది. ఆమె చర్మంపై తెల్లటి మచ్చలు ఏర్పడినట్టు తెలిపింది. ప్రస్తుతం దానికి చికిత్స తీసుకుంటున్నట్టు వెల్లడించింది. ఇదే అంశంపై ఆమె ఓ ట్వీట్ చేశారు. "ప్రియమైన సూర్యుడా... నాకు గతంలో కంటే ఇపుడు నీ సూర్యకాంతి ఎక్కువ అవసరం. నేను నా రంగును కోల్పోతున్నాను. నేను ప్రతి రోజూ ఉదయం నీ కోసం ఎదురు చూస్తుంటాను. ఆ పొగమంచులో సూర్యకిరణాలు మెరుస్తుంటే చూస్తున్నాను. అవి నన్ను తాకాలని వాటి కోసం బయటకు వస్తున్నాను. నాకు ఇపుడు వాటి అవసరం ఎంతైనాఉంది. నీ దయతో ఇక్కడ ఉన్నాను. నీకు ఎప్పటికీ రుణపడి ఉంటాను" అని పేర్కొంది.
