తన పెద్ద కుమారుడు నాగ చైతన్యపై హీరో, నిర్మాత నాగార్జున ప్రశంసల వర్షం కురిపించారు. ఓ తండ్రిగా కాదు.. ఓ నిర్మాతగా చెపుతున్నా.. నా హీరో సూపర్ అంటూ కితాబిచ్చాడు. నాగ చైతన్య, రకుల్ ప్రీత్ సింగ్ జంటగా నటించిన చిత్రం "రారండోయ్ వేడుక చూద్దాం" చిత్రం ఆడియో ఇటీవల జరిగింది.
ఇందులో ఈ చిత్ర నిర్మాత అక్కినేని నాగార్జున మాట్లాడుతూ 'ఈ సినిమాలో చక్కటి పల్లెటూరి పిల్లలాగా రకుల్ ప్రీత్ సింగ్ ఓణీలు వేసుకుంటుంది. ఈ సినిమాలో ఆమె పర్ఫార్మెన్స్ చాలా బాగుంది. ఇక, కొడుకు గురించి తండ్రి ఎక్కువ పొగడకూడదు. మరి ఎలా? ఈ సినిమాకు నేను ప్రొడ్యూసర్‌ని... ప్రొడ్యూసర్‌గా చెబుతున్నాను.. నా హీరో సూపర్. చాలా బాగా చేశాడు. మీరు, ఎలా చూడాలనుకుంటున్నారో అలా చేశాడు. ఈ సినిమాలో కొత్త నాగ చైతన్యను చూస్తారు.. అతనితో ప్రేమలో పడిపోతారు. మై హీరో సూపర్.. నేను శిల్పకళా వేదికలో ‘సోగ్గాడే చిన్నినాయన’ ఆడియో ఫంక్షన్‌లో ఆ రోజు నేను ఏమన్నాను.. ఇప్పుడు మళ్లీ అదే చెబుతున్నా, వస్తున్నాం.. మళ్లీ కొడుతున్నాం..ఇది ఫిక్స్’ అని నాగార్జున హుషారుగా అన్నారు.
ఇక హీరో నాగ చైతన్య మాట్లాడుతూ... ‘రారండోయ్ వేడుక చూద్దాం’ సినిమా చేస్తున్నప్పుడు తాను మొదట భయపడ్డానని, ఎందుకంటే, ఈ తరహా చిత్రంలో నటించడం తనకు ఇదే మొదటి సారి అని, ఇప్పుడు ఆ భయం పోయిందన్నాడు. ఈ చిత్రం మంచి విజయం సాధిస్తుందని అన్నాడు. భ్రమరాంబ పాత్రలో నటించిన రకుల్ ప్రీత్ సింగ్ నటన బాగుందని, ఏ హీరోయిన్ రకుల్ పాత్రను అంత అద్భుతంగా పోషించలేదని కితాబు ఇచ్చాడు.
