ఎన్టీఆర్‌లో మహానటిగా నిత్యామీనన్..

నందమూరి తారక రామారావు జీవిత చరిత్ర ఆధారంగా రూపొందుతున్న ''ఎన్టీఆర్'' సినిమా షూటింగ్ శరవేగంగా జరుగుతోంది. ఈ సినిమాలో మహానటి సావిత్రి పాత్రలో కీర్తి సురేష్ నటిస్తుందని అందరూ అనుకున్నారు. కానీ కాల్షీట్స్‌లో డేట్స్ అడ్జెస్ట్ కాకపోవడంతో ఆ పాత్రకు నిత్యామీనన్‌ను ఎంపిక చేసినట్లు తెలుస్తోంది. 

ఇందులో ఎన్టీఆర్‌గా బాలకృష్ణ నటిస్తున్నారు. క్రిష్‌ దర్శకత్వం వహిస్తున్నారు. బసవతారకంగా బాలీవుడ్‌ నటి విద్యా బాలన్‌ నటిస్తుండగా, చంద్రబాబు నాయుడిగా రానా, ఏఎన్నార్‌గా సుమంత్‌ నటిస్తున్న సంగతి తెలిసిందే. తాజాగా 'మహానటి' సావిత్రి పాత్రలో నిత్యా మీనన్‌ నటించనున్నారట. ఎన్టీఆర్‌, సావిత్రి కలిసి ఎన్నో సూపర్‌హిట్‌ చిత్రాల్లో నటించారు. అందులో 'మిస్సమ్మ', 'మాయాబజార్‌', 'రక్త సంబంధం' చిత్రాలు ప్రధానంగా చెప్పుకోవచ్చు. 

ఇకపోతే.. ఎన్టీఆర్‌ కుమార్తె పురంధేశ్వరిగా ప్రముఖ నృత్య కారిణి హిమన్సీ నటిస్తున్నట్టు సమాచారం. ఈ బయోపిక్‌ సంక్రాంతి కానుకగా విడుదల కానుంది. మరోవైపు జయలలిత జీవితం ఆధారంగా రూపొందనున్న 'ది ఐరన్‌ లేడీ' బయోపిక్‌లో నిత్యామీనన్‌ జయలలితగానూ నటించే అవకాశం ఉందని టాక్ వస్తోంది.