బిగ్ బాస్ సీజన్-7 విజేత పల్లవి ప్రశాంత్‌ను పోలీసులు అరెస్ట్ చేశారు. అతని సోదరుడిని కూడా అదుపులోకి తీసుకున్నారు. టైటిల్ అందుకున్న రోజు రాత్రి హైదరాబాద్‌లోని అన్నపూర్ణ స్టూడియోలో ప్రభుత్వ, ప్రైవేట్ వాహనాలను ధ్వంసం చేసిన కేసులో ప్రశాంత్‌పై జూబ్లీహిల్స్ పోలీసులు కేసు నమోదు చేసిన సంగతి తెలిసిందే. ఈ క్రమంలో బుధవారం అతడిని స్వగ్రామం కొలుగూరులో అరెస్టు చేసి హైదరాబాద్‌లోని జూబ్లీహిల్స్ పీఎస్‌కు తరలించినట్లు సమాచారం.
బిగ్ బాస్ ఫైనల్స్ నేపథ్యంలో ఆదివారం రాత్రి హైదరాబాద్‌లోని అన్నపూర్ణ స్టూడియోస్ వద్ద తీవ్ర ఉద్రిక్తత నెలకొంది. అన్నపూర్ణ స్టూడియోస్‌కు చేరుకున్న పల్లవి ప్రశాంత్, అమర్‌దీప్‌ అభిమానుల మధ్య వాగ్వాదం చోటుచేసుకుంది. టైటిల్ గెలుచుకున్న ప్రశాంత్ స్టూడియోస్ నుంచి బయటకు వచ్చి అభిమానులు ఘనంగా స్వాగతం పలికారు.
ఈ దాడులకు పల్లవి ప్రశాంత్ కారణమని తేల్చారు. ఈ కేసులో పల్లవి ప్రశాంత్‌ను ఏ-1గా, అతని సోదరుడు మనోహర్‌ను ఏ-2గా, అతని స్నేహితుడు వినయ్‌ను ఏ-3గా చేర్చారు. అయితే ఈ కేసులో ఏ-4గా ఉన్న ఉప్పల్ మేడిపల్లికి చెందిన లాంగ్ డ్రైవ్ కార్లలో డ్రైవర్లుగా పనిచేస్తున్న సాయికిరణ్ (25), అంకిరావుపల్లి రాజు (23)లను పోలీసులు ఇప్పటికే అరెస్టు చేశారు. తాజాగా పల్లవి ప్రశాంత్‌తో పాటు అతని సోదరుడిని కూడా అదుపులోకి తీసుకున్నారు.
