సామాజిక సమస్యలు, రాజకీయాల పైనే జనసేన చీఫ్ పవన్ కళ్యాణ్ ఎక్కువగా ట్విట్టర్లో స్పందిస్తారు. కానీ తొలిసారి పవన్ కళ్యాణ్ తన ట్విట్టర్లో ఓ సినిమా గురించి ప్రస్తావిస్తూ ఆ చిత్ర బృందాన్ని ప్రశంసల్లో ముంచెత్తారు. వసూళ్లను అద్భుతంగా రాబడుతూ దేశంలోనే సంచలనం సృష్టిస్తున్న అమీర్ ఖాన్ 'దంగల్' చిత్రం గురించి పవన్ కళ్యాణ్ ప్రస్తావించారు. అమిర్ ఖాన్ ఈ చిత్రంలో అద్భుత నటనని కనబరిచారని, ఆనటనతోనే ఆయన ప్రపంచ వ్యాప్తంగా అభిమానుల మనసులు గెలుచుకున్నారని పవన్ కళ్యాణ్ ప్రశంసించారు.
ఈ చిత్రాన్ని చూసిన తరువాత తాను 'దంగల్' గురించి తన అభిప్రాయాన్ని చెప్పకుండా ఉండలేకపోతున్నానని పవన్ కళ్యాణ్ అన్నారు. ఈ చిత్రానికి దర్శకత్వం వహించిన నితీష్ తివారీని ప్రత్యేకంగా పవన్ కళ్యాణ్ అభినందించారు. ప్రేక్షకులు లీనమయ్యేలా ఈ చిత్రాన్ని తెరకెక్కించారని పవన్ కళ్యాణ్ అన్నారు. మిగతా నటీనటులను, సాంకేతిక బృందానికి కూడా పవన్ కళ్యాణ్ అభినందనలు తెలిపారు.
ఈ చిత్రం మహిళల సాధికారత గురించి మనందరం ఆలోచించేలా చేసిందని పవన్ కళ్యాణ్ అన్నారు. కాగా తన ట్విట్టర్లో ఎప్పుడూ పవన్ కళ్యాణ్ రాజకీయ, సామజిక సమస్యల గురించే ట్వీట్లు చేస్తూంటారు. ఓ సినిమా గురించి ట్వీట్ చేయడం ఇదే తొలిసారి. ఈ చిత్రంలో మహిళల సాధికారత గురించి అద్భుతంగా చూపించడంతో చిత్ర బృందాన్నిఅభిందించాలని పవన్ కళ్యాణ్ ఈ చిత్రంపై స్పందించారు.
