అవును.. చిన్నతనంలో నేను కూడా లైంగిక వేధింపులకు గురయ్యాను: సోనమ్ కపూర్

అంద‌రి అమ్మాయిల్లానే తాను కూడా యుక్త వ‌య‌సులో లైంగిక వేధింపుల‌కు గుర‌య్యానని నటి తాప్సీ తెలిపింది. కాలేజ్ డేస్ లో చాలాసార్లు ర్యాగింగ్‌కు గుర‌య్యాన‌ని తాప్సీ వెల్లడించిన సంగతి తెలిసిందే. ఇదే బాటలో ఓ స్టార్ కుమార్తె.. ప్రస్తుత బాలీవుడ్ హీరోయిన్ సోనమ్ కపూర్ కూడా చిన్నతనంలోనే తాను లైంగిక వేధింపులకు గురైందట. ఈ విషయాన్ని అనుష్క శర్మ, విద్యాబాలన్, రాధికా ఆప్టే, ఆలియాభట్‌లతో ఏర్పాటు చేసిన రౌండ్‌ టేబుల్‌ సమావేశంలో సోనమ్‌ వెల్లడించింది. మొదటినుంచి చాలా నిర్మొహమాటంగా మాట్లాడతారన్న పేరున్న సోనమ్‌ ఇక్కడ కూడా తనదైన శైలిలో కుండ బద్దలు కొట్టినట్లు మాట్లాడారు.

ఈ సమావేశంలో సినీ విమర్శకుడు రాజీవ్‌ మసంద్‌తో సోనమ్‌ మాట్లాడుతూ.. 'నాకు తెలుసు. చిన్నవయసులోనే నేను లైంగిక వేధింపులకు గురయ్యాను. ఆ అనుభవం చాలా బాధాకరంగా ఉంటుంది' అన్నారు. నటుడు అనిల్‌ కపూర్‌ కుమార్తె అయినప్పటికీ సోనమ్ కపూర్ చిన్నతనంలో లైంగిక వేధింపులకు గురయ్యానని పబ్లిక్‌గా చెప్పడంతో సినీ ఇండస్ట్రీతో పాటు ఆమె అభిమానులు షాక్ తిన్నారు. 

2016 సంవత్సరంలో బాలీవుడ్‌లో తమ నటనా సామర్థ్యంతో మంచి విజయాలు సాధించిన నటీమణులతో రాజీవ్‌ మసంద్‌ ఈ కార్యక్రమం ఏర్పాటుచేశారు. ఈ కార్యక్రమం ద్వారా తమ అనుభవాలను ప్రేక్షకులతో పంచుకోవడంతో మిగిలిన మహిళల్లో చైతన్యం నింపగలనని సోనమ్ వెల్లడించింది.