'జబర్దస్త్', పటాస్‌లకు కొత్త చిక్కు.. నిషేధించాలని సంతకాల సేకరణ

''జబర్దస్త్'' షోను గతంలో పలు వివాదాలు వెంటాడాయి. తాజాగా పటాస్ షోకు కూడా చిక్కులు తప్పలేదు. తెలుగు టీవీ ఛానళ్లలో ప్రసారం అయ్యే జబర్దస్త్, పటాస్ వంటి రియాల్టీ షోల్లో మహిళలను కించపరుస్తూ ఆరోపణలు వస్తున్నాయని.. వాటిని నిషేధించాలని మహిళా సంఘాలు ఇప్పటికే డిమాండ్ చేశాయి.

తాజాగా విజయవాడలో మహిళా సమాఖ్య ఆధ్వర్యంలో సంతకాల సేకరణ జరుగుతుండగా.. వేలాది మంది మద్దతు ఇస్తున్నారు. డబుల్ మీనింగ్ డైలాగులతో కూడిన ఈ షోలను ప్రదర్శించకూడదని.. ఈ షోలను నిషేధించాలని వారు కోరుతున్నారు. 

అలాగే అశ్లీల వెబ్ సైట్లను కూడా తొలగించాలని కోరుతూ ఏపీ మహిళా సమాఖ్య, ఐద్వా తదితర సంఘాల ఆధ్వర్యంలో సంతకాల సేకరణ జరుగుతోంది. ఇంకా అసభ్యకర షోలను ఆపేందుకు సర్కారు నడుం బిగించాలని.. మీడియా వాచ్ కమిటీలను వెంటనే ఏర్పాటు చేయాలని మహిళా నేతలు డిమాండ్ చేశారు.

టీఆర్పీ రేటింగ్ కోసం ఇలాంటి షోలను ప్రోత్సహించడం సరికాదని ఐద్వా నాయకురాలు కె.శ్రీదేవి, విజయవాడ మహిళా సమాఖ్య ప్రెసిడెంట్ ఓ భారతి మండిపడ్డారు. కాగా ఇలాంటి షోల్లో డబుల్ మీనింగ్ డైలాగులు, ప్రత్యేక వర్గాన్ని టార్గెట్ చేసిన వ్యాఖ్యలు వివాదానికి దారి తీశాయి. ముఖ్యంగా జబర్దస్త్ స్కిట్‌లపై, నటులపై కేసులు కూడా నమోదైన సంగతి తెలిసిందే.