కరోనా' వైరస్‌ నివారణ పనుల్లో వైద్యులు, నర్సులు, పోలీసులు, రైల్వే భద్రతా పోలీసులు సహా మొత్తం 16 శాఖల సిబ్బంది పాల్గొంటున్నారు. వీరి సౌకర్యార్ధం అరక్కోణం నుంచి జోలార్‌పేట వరకు బుధవారం నుంచి 3 బోగీలతో ప్రత్యేక రైలును ఏర్పాటు చేశారు. అరక్కోణం నుంచి ఉదయం 6 గంటలకు బయల్దేరే రైలు 9 గంటకు జోలార్‌పేట చేరుకుంటుంది.
అలాగే, సాయంత్రం 6 గంటలకు జోలార్‌పేట నుంచి బయల్దేరి రాత్రి 9 గంటలకు అరక్కోణం చేరుకుంటుంది. ఈ రైలు షోలింగర్‌, వాలాజా, కాట్పాడి, గుడియాత్తం, అంబూరు స్టేషన్లలో ఆగుతుందని, రైల్వే అధికారులు మంజూరు చేసిన పాస్‌లు పొందిన వారు ఈ రైలులో ఉచితంగా ప్రయాణించవచ్చని దక్షిణ రైల్వే తెలియజేసింది.
తమిళనాడులో ఏప్రిల్‌ 30 వరకు లాక్‌డౌన్‌ అమలు చేస్తున్నట్టు ఆ రాష్ట్ర సర్కారు వెల్లడించింది. కొవిడ్‌ 19 వ్యాప్తిని అరికట్టేందుకు ప్రస్తుతం కొనసాగుతున్న లాక్‌డౌన్‌ను ఈ నెల 30వరకు పొడిగిస్తున్నట్టు సీఎం పళనిస్వామి ప్రకటించారు. ఇప్పటికే తెలంగాణ, పంజాబ్‌, ఒడిశా, మహారాష్ట్ర, బెంగాల్‌ లాక్‌డౌన్‌ను ఈ నెలాఖరు వరకు పొడిగించగా.. ఈ జాబితాలో తాజాగా తమిళనాడు చేరింది.
