ఆస్తుల కోసమే అమృత ఇదంతా చేస్తుంది.. ఆ వీడియోలో అలా లేదే?

తమిళనాడు దివంగత సీఎం జె.జయలలిత తన జీవితం ఎప్పుడూ గర్భం దాల్చలేదని తమిళనాడు సర్కారు తరపు న్యాయవాది మద్రాస్ హైకోర్టుకు వెల్లడించారు. తాను జయలలిత కుమార్తెనంటూ బెంగళూరుకు చెందిన అమృత కేసు వేసిన సంగతి తెలిసిందే. ఈ కేసు సంబంధించి.. 1980 నాటి జయలలిత వీడియో క్లిప్‌లను ప్రభుత్వం కోర్టుకు సమర్పించింది. 

జయలలిత ఆస్తులపై కన్నేసిన అమృత వాటిని సొంతం చేసుకునేందుకే ఈ వ్యాఖ్యలు చేసినట్టు తమిళనాడు అడ్వకేట్ జనరల్ విజయ్ నారాయణ్ పేర్కొన్నారు. జయలలితకు తాను 1980 ఆగస్టులో పుట్టినట్టు అమృత తన పిటిషన్‌లో పేర్కొంది. కానీ అదే ఏడాది జయలలిత ఓ అవార్డు కార్యక్రమంలో పాల్గొన్న వీడియోను తమిళనాడు సర్కారు కోర్టుకు సమర్పించింది.

అమృత పుట్టినట్టు చెబుతున్న తేదీకి నెల రోజుల ముందే ఈ కార్యక్రమం జరిగిందని, ఈ వీడియోలో జయ గర్భంతో ఉన్న ఆనవాళ్లు లేవని ప్రభుత్వ తరపు న్యాయవాది కోర్టుకు వెల్లడించారు. వాదనలు విన్న కోర్టు తదుపరి విచారణను వచ్చే వారానికి వాయిదా వేసింది. అదే విధంగా అమృత, జయలలిత కూతురని చెప్పడానికి ఎలాంటి ఆధారాలు లేవని చెప్పారు. అవసరం అనుకుంటే జయలలిత బంధువుల డీఎన్‌ఏతో అమృత డీఎన్ఏను పోల్చి చూడాలని కోరారు.