మరో మూడు నెలల్లో తెలంగాణ రాష్ట్ర ఏర్పాటు: జీవన్ రెడ్డి
మరో మూడు నెలల్లో తెలంగాణ రాష్ట్రం ఏర్పాటు కాబోతుందని తెలంగాణ ప్రాంతానికి చెందిన కాంగ్రెస్ సీనియర్ నేత, మాజీ మంత్రి టి.జీవన్ రెడ్డి జోస్యం చెప్పారు. ఈ మూడు నెలల కాలం కోసం మంత్రిత్వశాఖల కోసం తెలంగాణ మంత్రులు పోటీపడరాదని హితవు పలికారు. అదేసమయంలో డిప్యూటీ సీఎం పదవిని తక్షణం తెలంగాణ ప్రాంతానికి చెందిన వ్యక్తికి ఇవ్వాలని ఆయన డిమాండ్ చేశారు.
గత కొంతకాలంగా మీడియాకు దూరంగా ఉంటూ వచ్చిన ఆయన గురువారం ఆకస్మికంగా మీడియా ముందుకు వచ్చి ముఖ్యమంత్రి కిరణ్ కుమార్ రెడ్డిపై విమర్శలు గుప్పించారు. కొత్త సీఎం వచ్చిన వెంటనే మాట తప్పారన్నారు. ముందుగా ప్రకటించినట్టుగా డిప్యూటీ సీఎం తెలంగాణ దళితునికి ఇవ్వలేదని మండిపడ్డారు.
ఏది ఏమైనా.. మరో మూడు నెలలో తెలంగాణ రాష్ట్రం ఏర్పాటు కాబోతుందని, ఆ తర్వాత ముఖ్యమంత్రి, ఉప ముఖ్యమంత్రితో పాటు.. అన్ని మంత్రిత్వ శాఖలను తెలంగాణ మంత్రులే చేపడుతారన్నారు. ఇలాంటి తరుణంలో తెలంగాణ ప్రాంతానికి చెందిన మంత్రులు శాఖల కోసం కయ్యానికి దిగడం మంచిది కాదన్నారు.
