యువనేత వైఎస్.జగన్మోహన్ రెడ్డిని నమ్ముకున్న ఎమ్మెల్యేలు, శాసనసభ్యులకు చివకు చిప్పకూడే మిగులుతుందని ప్రదేశ్ కాంగ్రెస్ కమిటీ ఛైర్మన్ కంతేటి సత్యనారాయణ రాజు అభిప్రాయపడ్డారు. తమను నమ్ముకున్న వారికి అన్నం పెట్టే బదులు సున్నం పెట్టే రకం వైఎస్.జగన్‌ది అని ఆయన అన్నారు.
శనివారం ఆయన హైదరాబాద్‌లో మాట్లాడుతూ.. విజయవాడలో జగన్ చేపట్టిన 24 గంటల లక్ష్యదీక్షలో 30 మంది ఎమ్మెల్యేలు పాల్గొన్నట్టు వార్తలు వచ్చాయన్నారు. ఈ సంఖ్య ఢిల్లీలో చేపట్టిన జలదీక్షా సమయానికి 24కు చేరుకుందని ఆయన గుర్తు చేశారు.
ఇకపోతే.. జగన్ వెంట నడిచిన ఎమ్మెల్యేలపై అనర్హత వేటు పడుతుందన్నారు. ఈ లోపు వారు మనస్సు మార్చుకుని పార్టీ నియమ నిబంధనలకు లోబడి నడుచుకోవాలని ఆయన హితవు పలికారు. అనర్హత వేటు, క్రమశిక్షణ అంశాలపై సరైన సమయంలో సరైన నిర్ణయం తీసుకుంటామని కంతేటి వెల్లడించారు.
