ప్రేమానురాగాలు దేశ హద్దులు సైతం చెరిగిపోతున్నాయి. నెట్స్‌లో ప్రాక్టీస్‌ చేస్తుండగా తనని కలిసేందుకు వచ్చిన అభిమానులకి సెల్ఫీలు, ఆటోగ్రాఫ్‌లు ఇస్తుంటారు. ఈ యేడాది ముగిసిన టీ20 ప్రపంచకప్‌లో భారత్‌, పాకిస్థాన్‌ మ్యాచ్‌కు ముందు ప్రాక్టీస్‌ సెషన్‌లో పాక్‌ పేసర్‌ మహ్మద్‌ అమీర్‌కు విరాట్ కోహ్లీ ఓ బ్యాట్‌ను బహుమతిగా అందజేసిన విషయం తెలిసిందే.
తాజాగా ఇలాంటి ఘటనే మరొకటి చోటుచేసుకుంది. ఇటీవల అమెరికాలో వెస్టిండీస్‌తో జరిగిన టీ20 సిరీస్‌ ఆడేందుకు అక్కడికి వెళ్లిన విరాట్ కోహ్లీని ఓ వీరాభిమాని కలిశారు. దాదాపు 90ల్లో ఉన్న ఓ బామ్మ శ్రమించి తనను కలిసేందుకు ప్రత్యేకంగా రావడంతో ఆనందంలో మునిగిపోయిన విరాట్ కోహ్లీ. ఆమెకు మైదానంలో తాను ధరించే జెర్సీని బహుకరించేశాడు. ఇప్పటివరకు తన మనసుకు నచ్చిన వారికి ఎక్కువగా బ్యాట్‌లనే బహుమతిగా ఇచ్చే విరాట్ కోహ్లీ బామ్మకి మాత్రం జెర్సీని అందజేసి అతి'పెద్ద' అభిమాని కళ్లలోని ఆనందాన్నిచూసి మురిసిపోయాడు.
