నీ బుల్లెట్టు బండెక్కి వచ్చేత్త అంటోన్న ఎంపీ కవిత.. వీడియో వైరల్

'నీ బుల్లెట్టు బండెక్కి వచ్చేత్త పా.. డుగు డుగు డుగు డుగు డుగు డుగని..'' ఇప్పుడు ఎక్కడ చూసినా ఈ పాటే వినిపిస్తోంది. పెళ్లిళ్లు, ఇతర శుభకార్యాల్లో బుల్లెట్ పాట మోత మోగిస్తోంది. అంతేకాదు ఇన్‌స్టా రీల్స్, యూట్యూబ్ షార్ట్స్, జోష్, మోజ్, టకాటక్, ఎంఎక్స్ వంటి షార్ట్ వీడియో అప్లికేషన్స్‌లోనూ దుమ్ము రేపుతోంది. లక్షలాది మంది ఈ పాటకు స్టెప్పులేసి సోషల్ మీడియాలో అప్‌లోడ్ చేస్తున్నారు. ఇక యూబ్యూట్‌లోనూ బుల్లెట్ పాట రికార్డులు సృష్టిస్తోంది. 

కోట్లాది వ్యూస్‌తో ట్రెండింగ్‌లో ఉంది. ఇటీవల ఓ పెళ్లి కూతురు, ఆస్పత్రిలో నర్సు.. బుల్లెట్ బండి పాటకు డ్యాన్స్ చేయడం.. సోషల్ మీడియాలో వైరల్‌గా మారింది. తాజాగా టీఆర్ఎస్ ఎంపీ మాలోత్ కవిత కూడా ఈ జానపదానికి అదిరిపోయే స్టెప్పులేశారు.

ఎంపీ మాలోత్ కవిత మంగళవారం మహబూబాబాద్ జిల్లా కేంద్రంలో జరిగిన ఓ పెళ్లికి హాజరయ్యారు. వధూవరులను ఆశీర్వదించిన తర్వాత.. బుల్లెట్ బండి పాటకు స్టెప్పులేశారు. వధూవరులతో పాటు ఎంపీ కవిత కూడా డ్యాన్స్ చేశారు. ప్రస్తుతం ఆ వీడియో కూడా సోషల్ మీడియాలో వైరల్‌గా మారింది.

కొన్ని రోజులు క్రితం మంచిర్యాల జిల్లాకు చెందిన ఓ పెళ్లి కూతురు చేసిన డ్యాన్స్ సోషల్ మీడియాను ఊపేసిన విషయం తెలిసిందే. ఆ తర్వాత ఓ నర్సు కూడా ఇదే పాటకు స్టెప్పులేసింది. రాజన్న సిరిసిల్ల జిల్లా తంగళ్లపల్లి పీహెచ్‌సీలో పనిచేస్తున్న నర్సు బుల్లెట్ పాటకు డాన్స్ చేసి ఆకట్టుకుంది. ఆ వీడియోను సోషల్ మీడియాలో షేర్ చేయడంతో.. పెళ్లి కూతురు వీడియోలా ఇది కూడా వైరల్‌ అయింది. ఐతే ఈ ఘటనపై జిల్లా కలెక్టర్ విచారణకు ఆదేశించడంపై విమర్శలు వెల్లువెత్తాయి.