భారతీయ చలనచిత్ర రంగం ఎప్పుడెప్పుడా అని ఎదురుచూస్తున్న తరుణం రానే వచ్చింది. దర్శకధీరుడు ఎస్ఎస్.రాజమౌళి దర్శకత్వంలో అత్యంత ప్రతిష్టాత్మకంగా తెరకెక్కిన "బాహుబలి 2" ట్రైలర్‌ను గురువారం ఉదయం విడుదల చేశారు. ఈ ట్రైలర్‌లో ప్రభాస్, రానా మధ్య వచ్చే యుద్ధ సన్నివేశాలను చూపించారు.
పైగా ‘‘నువ్వు నా పక్కన ఉన్నంత వరకూ నన్ను చంపే మగాడింకా పుట్టలేదు మామా’’ అని బాహుబలి కట్టప్పను ఉద్దేశించి చెప్పే డైలాగ్ సినిమాపై అంచనాలను మరింత పెంచింది. కట్టప్ప బాహుబలిని ఎందుకు చంపాడనే విషయం ఉత్కంఠ రేపుతుంటే, ఇప్పుడు ఈ డైలాగ్ ఆ కుతూహలాన్ని మరింత పెంచింది.
అంతేకాకుండా, ఇందులో ప్రభాస్ డైలాగులు అద్భుతంగా ఉన్నాయి... "అమరేంద్ర బాహుబలి అనే నేను.. మహిష్మతి రాజ ప్రజల ధన, మాన, ప్రాణాలను రక్షించేందుకు ప్రాణత్యాగం చేసేందుకు వెనుకంజ వేయను, ఇది రాజమాత శివగామి సాక్షిగా ప్రమాణం చేస్తున్నా" అంటూ ప్రమాణం చేస్తున్నారు.
ఇందులో అనుష్కను ఎంతో అందంగా చూపించారు. అలాగే, కట్టప్పతో పాటు.. రానా, నాజర్‌లో ఆక్రోశం, యుద్ధ సన్నివేశాలు, మహిష్మతి రాజ్యాన్ని ఎంతో అందంగా చిత్రీకరించారు.
