ఇటీవలికాలంలో హోంవర్క్ చేయని చిన్నారుల పట్ల ఉపాధ్యాయులు నడుచుకుంటున్నతీరు తీవ్ర ఆందోళనకు గురిచేస్తోంది. కొంతమంది టీచర్లు అయితే మరీ పైశాచికత్వంగా ప్రవర్తిస్తున్నారు. తాజాగా హోంవర్క్ చేయని కారణంగా ఓ విద్యార్థినితో తరగతి గదిలో బట్టలు విప్పించారు. ఈ ఘటన హైదరాబాద్, ఏఎస్ రావు నగర్‌లో జరిగింది.
ఏఎస్.రావు నగర్‌లో ఉన్న గౌతం మోడల్ స్కూల్‌లో దారుణం జరిగింది. విద్యార్థి హోంవర్క్ చేయలేదని ఇంగ్లీష్ టీచర్ గట్టిగా మందలించడమేకాకుండా విద్యార్థినితో బట్టలిప్పించారు. విషయం తెలుసుకున్న విద్యార్థి తల్లిదండ్రులు స్కూల్‌‌కు వచ్చి టీచర్, యాజమాన్యంపై ఆగ్రహం వ్యక్తంచేస్తూ.. సంబంధిత టీచర్‌ను సస్పెండ్ చేయాలని డిమాండ్ చేస్తూ ఆందోళనకు దిగారు. హోమ్ వర్క్ చేయనంత మాత్రాన ఈ విధంగా చేస్తారా? అంటూ మండిపడ్డారు. దీనిపై స్థానిక పోలీసులకు ఫిర్యాదు చేయగా, కేసు నమోదు చేసి విచారణ జరుపుతున్నారు.
