అత్యాచారం చేసే ముందు అరెస్టు చేస్తే ప్రభుత్వ ఉద్యోగం ఊడుతుందన్న విషయం గుర్తుకురాలేదా అని ఓ నిదింతుడిని సుప్రీంకోర్టు ప్రశ్నించింది. అదేసమయంలో అత్యాచారం చేసిన బాలికను వివాహం చేసుకుంటామంటే.. బెయిల్ మజూరు చేసే విషయాన్ని పరిశీలిస్తామని, అలాగని పెళ్లి చేసుకోవాలని తాము ఒత్తిడి చేయడం లేదని సుప్రీంకోర్టు వ్యాఖ్యానించింది.
మహారాష్ట్ర విద్యుత్తు ఉత్పాదన సంస్థలో టెక్నీషియన్‌గా పనిచేస్తున్న మోహిత్‌ సుభాష్‌ చవాన్‌ (23) అనే వ్యక్తి 2014-15 ప్రాంతంలో తన దగ్గర బంధువైన బాలికపై పలుమార్లు అత్యాచారం చేసినట్టు ఆరోపణలు వచ్చాయి. దీనిపై స్థానిక పోలీసులకు ఫిర్యాదు అందింది. అప్పటికి ఆమె వయసు 16 ఏళ్లు కావడంతో పోక్సో చట్టం కింద కేసు నమోదైంది.
ఈ కేసులో ముందస్తు బెయిల్ కోసం దరఖాస్తు చేయగా, బాంబే హైకోర్టు తిరస్కరించింది. దాంతో సుప్రీంకోర్టును ఆశ్రయించగా ప్రధాన న్యాయమూర్తి జస్టిస్‌ ఎస్‌.ఎ.బోబ్డే, జస్టిస్‌ ఎ.ఎస్‌.బోపన్న, జస్టిస్‌ వి.రామసుబ్రమణియన్‌లతో కూడిన ధర్మాసనం విచారణ చేపట్టింది.
అయితే ఆయనకు ఇప్పటికే వేరే మహిళతో వివాహం జరిగిందని నిందితుని తరపు న్యాయవాది తెలిపారు. తొలుత ఆ బాలికనే పెళ్లాడాలని అనుకున్నారని, కానీ అందుకు ఆమె తిరస్కరించడంతో వేరేవారిని చేసుకున్నారన్నారు. ఆయనను అరెస్టు చేస్తే ఉద్యోగం నుంచి సస్పెండ్‌ చేస్తారని తెలిపారు.
