కరోనా వైరస్ కారణంగా అనేక ప్రాంతాలు కంటైన్మెంట్ జోన్లుగా ప్రకటించారు. ఇలాంటి ప్రాంతాల్లో మద్యం విక్రయాలు నిలిపివేశారు. దీంతో ఈ ప్రాంతాల్లో నివసించే తాగుబోతులు... మద్యం కోసం అర్రులు చాస్తున్నారు. మద్యానికి బానిసలైన కొందరు ఇతర మార్గాల్లో మత్తులో జోగుతున్నారు. తాజాగా ప్రకాశం జిల్లాలో శానిటైజర్ తాగి ఏకంగా 8 మంది మృత్యువాతపడ్డారు. మద్యానికి ప్రత్యామ్నాయంగా కొందరు శానిటైజర్ తాగితే.. మరికొందరు నాటు సారాలో శానిటైజర్ కలుపుకుని సేవించడంతో ప్రాణాలు కోల్పోయారు.
తాజాగా వెలుగులోకి వచ్చిన ఈ వివరాలను పరిశీలిస్తే, ప్రకాశం జిల్లాలోని కురిచేడు అమ్మవారి ఆలయం వద్ద బిక్షమెత్తుకునే ఇద్దరు యాచకులు మద్యానికి బానిసయ్యారు. అయితే, మద్యం ధరలు పెరగడంతో ప్రత్యామ్నాయంగా గత కొన్ని రోజులుగా శానిటైజర్ తాగుతున్నారు.
