ఏపీ మంత్రి కొడాలి నాని మరోమారు టీడీపీ అధినేత నారా చంద్రబాబుపై తీవ్రస్థాయిలో రెచ్చిపోయారు. తప్పు చేసిన ఏ ఒక్కడినీ వదిలిపెట్టం అంటూ హెచ్చరించారు. ఆయన ఆదివారం మీడియాతో మాట్లాడుతూ, 2004, 2009లోనూ చంద్రబాబును వైఎస్ఆర్ ఓడించారని ఆయన గుర్తు చేశారు. 2019లో వైఎస్ జగన్‌ను కూడా ప్రజలు భారీ మెజార్టీతో గెలిపించారని తెలిపారు.
చంద్రబాబు నాయుడు గంటకో మాట, పూటకో మాట మాట్లాడుతారని ఆయన విమ‌ర్శించారు. ప్రజల సొమ్మును దోచుకున్న వారిని తాము వదిలిపెట్టబోమ‌ని తెలిపారు. చంద్రబాబు మళ్లీ అధికారంలోకి వచ్చే పరిస్థితి లేదని, అలాగే, క‌నీసం ఎమ్మెల్యేగా గెలవలేని లోకేశ్ మళ్లీ అధికారంలోకి వస్తాడా? అని ఆయన ప్ర‌శ్నించారు.
జగన్ పాలనలో ప్రజా సంక్షేమం కొన‌సాగుతోంద‌ని చెప్పారు. కరోనా వల్ల అనాథలైన పిల్లలకు రూ.10 లక్షల ఫిక్స్‌డ్‌ డిపాజిట్‌ చేశామని చెప్పారు. జగన్ బాటలోనే కేంద్ర ప్రభుత్వం కూడా నడిచిందని చెప్పుకొచ్చారు. జగన్ పాలనలో విద్య, వైద్యానికి అత్యంత ప్రాధాన్యత ఇచ్చారని ఆయన చెప్పారు. కానీ, చంద్రబాబు మాత్రం ఎన్నికల్లో గెలిచేందుకు అడ్డమైన హామీలు ఇచ్చారని నాని అన్నారు.
