కలియుగ వైకుంఠం సుప్రసిద్ధ పుణ్యక్షేత్రం తిరుమలలో మహా సంప్రోక్షణ కార్యక్రమం గురువారం ముగియనుంది. ఆరు రోజుల పాటు కొనసాగుతున్న మహా సంప్రోక్షణను టీటీడీ అధికారులు గురువారంతో ముగించనున్నారు. గురువారం మధ్యాహ్నం 12 గంటలలోపు స్వామివారి మూలమూర్తిలో జీవకళలను మళ్లీ ప్రవేశ పెట్టి మహా సంప్రోక్షణ క్రతువును ముగించనున్నారు.
ఆరు రోజుల పాటు కొనసాగిన ఈ మహా సంప్రోక్షణ కార్యక్రమంలో ఆంధ్రప్రదేశ్, తమిళనాడు, కర్ణాటక రాష్ట్రాలకు చెందిన 45మంది రుత్వికులు, 20మంది యాగ పారాయణదారులు, 50మంది పురాణ పఠనదారులు, 40 మంది దివ్య ప్రబంధనదారులు పాల్గొని స్వామివారికి సేవలందించారు.
ఇక మహా సంప్రోక్షణలో భాగంగా బుధవారం స్వామివారికి తిరుమంజనంను అర్చకులు శాస్త్రోక్తంగా నిర్వహించారు. గోపురాల కలశాలను అద్దంలో చూసి... వాటి ప్రతిబింబాలకు అభిషేకం చేశారు. తిరుమలలోని పలు ఆలయాల గోపురాల కలశాలకు పవిత్రజలం, పాలతో అభిషేకాలు నిర్వహించారు.
