మగాడిగా ఉండలేను.. హిజ్రాగానే జీవిస్తానంటూ పోలీసుల ఎదుట బోరున విలపించాడో ఓ యువకుడు. పైగా, తల్లిదండ్రులతో కలిసి ఇంటికి వెళ్లేందుకు ససేమిరా అన్నాడు. దీంతో ఏం చేయాలో.. సమస్యను ఎలా పరిష్కరించాలో తెలియక పోలీసులు తలలు పట్టుకున్నారు. చిత్తూరు జిల్లా పలమనేరు రూరల్‌లో వెలుగులోకి వచ్చిన ఈ వివరాలను పరిశీలిస్తే....
జిల్లాలోని రామకుప్పం మండలం బగలనత్తం గ్రామానికి చెందిన మురుగేశ్.. పలమనేరు పట్టణంలోని ఎస్సీ బాలుర హాస్టల్‌లో ఉంటూ విద్యాభ్యాసం చేస్తున్నాడు. గత నెలలో ఇంటికి వెళ్లి వస్తానని చెప్పి అమ్మాయిలామారి పలమనేరు పోలీసుల వద్దకు వచ్చాడు. ఈ విషయం తెలుసుకున్న మురుగేశ్ తల్లిదండ్రులు పోలీసులకు నచ్చజెప్పి తమ బిడ్డను బలవంతంగా ఇంటికి తీసుకెళ్లారు.
కానీ, సోమవారం మురుగేశ్ మళ్లీ కొంతమంది హిజ్రాలను వెంటబెట్టుకుని స్టేషన్‌కు వచ్చాడు. తాను మగాడిగా జీవించలేనని, అమ్మాయిగా జీవిస్తానని ఎంత వేడుకుంటున్నా కుటుంబ సభ్యులు సమ్మతించకుండా వేధిస్తున్నారంటూ పోలీసులకు ఫిర్యాదు చేశాడు.
