వరంగల్ జిల్లాలో మంచిపట్టున్న నేతలుగా పేరొందిన కొండా సురేఖ, ఆమె భర్త కొండా మురళిలు తిరిగి సొంతగూటికి చేరనున్నారు. వారిద్దరూ బుధవారం తిరిగి కాంగ్రెస్ కండువా కప్పుకునేందుకు సిద్ధమయ్యారు. ఢిల్లీలో కొండా దంపతులు కాంగ్రెస్ సీనియర్ నేత గులాం నబీ ఆజాద్‌ను కలిసి కాంగ్రెస్ పార్టీలో చేరే అవకాశం ఉంది.
మంగళవారం విలేకరులతో మాట్లాడుతూ తీవ్రస్థాయిలో విమర్శలు గుప్పించిన కొండా సురేఖ... సాయంత్రానికి ఢిల్లీ చేరుకున్నారు. బుధవారం ఉదయం గులాం నబీ ఆజాద్‌తో వీరిద్దరూ సమావేశంకానున్నారు. ఆజాద్‌తో భేటీ అనంతరం మధ్యాహ్నం సమయంలో ఏఐసీసీ అధ్యక్షుడు రాహుల్‌ సమక్షంలో వారు కాంగ్రెస్‌లో చేరే అవకాశాలు ఉన్నట్టు తెలుస్తోంది.
