భార్యను ఓ యువకుడు వేధిస్తున్నాడని తెలుసుకున్న భర్త అతడిని హత్య చేసి పూడ్చేశాడు. ఈ కేసులో హత్య చేసిన నిందితుడికి జీవిత ఖైదు, మూడువేల రూపాయల జరిమానా పడింది. ప్రాసిక్యూషన్‌ కథనం ప్రకారం పెదపాడు మండలం కొత్తూరు గ్రామానికి చెందిన బడుగు ఆలీ (20) తల్లిదండ్రులు చనిపోవడంతో అతని బంధువైన బడుగు ప్రేమావతి వద్ద ఉంటున్నాడు. అదే గ్రామానికి చెందిన కూరెళ్ళ వెంకటేశ్వరరావు (28) భార్యను ఆలీ వేధిస్తున్నట్టుగా గుర్తించి కక్ష పెంచుకున్నాడు.
2013 డిసెంబర్‌ 23వ తేదీన అలీని తన వెంట తీసుకెళ్లిన వెంకటేశ్వరరావు.. ఫూటుగా తాగించి ఆంజనేయ స్వామి గుడి సమీపంలో ఉన్న కాల్వ వద్దకు తీసుకువెళ్ళి హత్యచేసి అక్కడే పూడ్చేశాడు. ఈ కేసుపై విచారణ జరిపిన పోలీసులు వెంకటేశ్వర రావును నిందితుడని తేల్చారు. ఈ కేసు ఏలూరులోని జిల్లా ప్రిన్సిపల్‌ సెషన్స్‌ కోర్టులో విచారణ సాగింది. నిందితుడైన వెంకటేశ్వరరావుపై నేరం రుజువు కావడంతో జీవిత ఖైదు, రూ.మూడు వేలు జరిమానా విధించారు.
