జీవీఎంసీ 50వ వార్డు పరిధిలోని గంగవరం గ్రామానికి చెందిన యెర్రిపిల్లి నూకరాజు (53)కు భార్య, కొడుకు, కూతురు ఉన్నారు. ఇద్దరు పిల్లలకూ వివాహాలు జరిపించాడు. పైగా, ఇద్దరు మనుమలు కూడా ఉన్నారు. స్థానికంగా ఉండే మట్టిపనులకు వెళ్లే నూకరాజు.. తమ ఇంట్లోకి టీవీ చూసేందుకు వచ్చే 13 యేళ్ల బాలికకు మాయమాటలు చెప్పి లోబరుచుకున్నాడు. ఆ తర్వాత ఓ యేడాదిగా అత్యాచారానికి పాల్పడుతూ వచ్చాడు.
ఈ క్రమంలో బాలికతో పాటు బాలిక శరీరంలో మార్పులు రావడాన్ని గమనించిన తల్లిదండ్రులు.. ఆస్పత్రికి తీసుకెళ్లి వైద్య పరీక్షలు చేయించారు. ఈ పరీక్షల్లో వారు నిర్ఘాంతపోయే నిజం వెల్లడైంది. ఆ బాలిక ఐదు నెలల గర్భవతి అని తేలింది. దీంతో తల్లిదండ్రులు ఏం జరిగిందని అడిగేసరికి విషయమంతా చెప్పింది. బాధితులు శుక్రవారం రాత్రి న్యూపోర్టు పోలీసులకు ఫిర్యాదు చేశారు. ఫిర్యాదు అందుకున్న పోలీసులు బాలికను వివరాలు అడిగి తెలుసుకున్నారు.
ఈ యేడాది జనవరి నుంచి అత్యాచారం చేస్తున్నాడని, ఇంటికి వెళ్లిన ప్రతిసారి తినడానికి ఏదో ఒకటి ఇచ్చేవాడని, అప్పుడప్పుడు రూ.20 ఇస్తుండేవాడని, ఎవరికైనా చెబితే చంపేస్తానని బెదిరించేవాడని బాలిక చెప్పినట్టు తెలిసింది. దీంతో నూకరాజును పోలీసులు అరెస్టు చేశారు. కేసు నమోదు చేసి పోక్సో చట్టం కింద కేసులు నమోదు చేశారు.
