ఉత్తరాంధ్రలో ప్రజా పోరాట యాత్ర చేస్తున్న జనసేన చీఫ్ పవన్ కళ్యాణ్ తెలంగాణ రాష్ట్ర ఏర్పాటు జూన్ 2 సందర్భంగా శుభాకాంక్షలు తెలుపుతూ లేఖ రాశారు. " కోట్లమంది ఆశయ సాధన ఫలితంగా సిద్ధించిన తెలంగాణ రాష్ట్రం నాలుగో ఆవిర్భావ దినోత్సవ సంబరాలు చేసుకుంటున్న శుభ తరుణంలో తెలంగాణ ప్రజలందరికీ నా హృదయ పూర్వక శుభాకాంక్షలు. ఆరున్నర దశాబ్దాల పోరాటంతో సిద్ధించిన ఈ రాష్ట్రం సుసంపన్నం కావాలంటే అందరూ కలసికట్టుగా పనిచేయాలి.
వందలమంది పోరాటయోధులు తమ ప్రాణాలను తృణప్రాయంగా త్యాగం చేసి తెలంగాణ ఉద్యమానికి ఊపిరి పోశారు. ఆ వీరుల త్యాగాలను ఎల్లవేళలా గుర్తు చేసుకుంటూ.. వారి కలలని సాకారం చేయాల్సిన బాధ్యత పాలకులపై వుంది. తెలంగాణ రాష్ట్రం పాడిపంటల్లో, పరిశ్రమల్లో, ఉపాధి ఉద్యోగ కల్పనల్లో ముందుకు వెళ్తూ, రాష్ట్రంలోని అన్ని ప్రాంతాలు సమాన అభివృద్ధి సాధించాలని ఆకాంక్షిస్తున్నాను'' అంటూ పేర్కొన్నారు.
