నూతన దంపతుల జీవితంలో విహార యాత్ర పెను విషాదం నింపింది. ఉత్తరాఖండ్ తెహ్రీ జిల్లా గులార్ ప్రాంతంలో ఆదివారం తెల్లవారుజామున బస్సు గంగా నదిలో కొట్టుకుపోయింది. ఈ ప్రమాదంలో ఆంధ్రప్రదేశ్ రాష్ట్రంలోని విజయనగరం జిల్లా రాజాం మండలం బొద్దాం గ్రామానికి చెందిన జరజాన రవి (30) ప్రాణాలు కోల్పోయాడు. ఈయన భార్య కల్యాణి విషమ పరిస్థితుల్లో రిషికేష్‌లోని ఓ ఆస్పత్రిలో చికిత్స పొందుతుంది.
మృతుడు హైదరాబాద్‌ నగరంలోని ఓ ప్రైవేటు కంపెనీలో పనిచేస్తున్నారు. ఈయనకు ఫిబ్రవరి నెల 12వ తేదీన కళ్యాణితో వివాహమైంది. ఈ నెల 5న వీరు యాత్రకు బయల్దేరారు. యమునోత్రి, గంగోత్రి, కేదారినాథ్, బద్రీనాథ్, హేమకుండ్ సాహిబ్‌కు టూర్ ప్లాన్ చేసుకున్నారు. కేదార్నాథ్ కొండపైకి వెళ్లేందుకు శనివారం సాయంత్రం రవి దంపతులు బస్సు ఎక్కి ప్రమాదంలో చిక్కుకున్నారు.
