గృహిణులకు వంటింటి చిట్కాలు... ఇవి చేసి చూడండి...

మనం తినే ఆహారం రుచిగా వుండాలని కోరుకుంటుంటాం. ఐతే ఎలాబడితే అలా చేస్తే రుచి రాదు కదా. అందుకే కొన్ని చిట్కాలను పాటిస్తే రుచికరమైన పదార్థాలను లాగించేయవచ్చు. చిట్కాలను చూడండి.

1. ముదిరి పోయిన ఆనప గింజల్ని బియ్యంతో కలిపి నానబెట్టి రుబ్బి దోసెల్లా పోసుకుంటే  చాలా రుచిగా ఉంటాయి.

2. అర కిలో చపాతి పిండికి రెండు మగ్గిన అరటి పండ్లు ఒక కప్పు పెరుగు చొప్పున కలిపితే చపాతీలు మెత్తగా ఉంటాయి.

3. మిగిలి పోయిన అన్నంలో ఎర్రకారం, జీలకర్ర కొంచెం ఉప్పు కలిపి మెత్తగా రుబ్బి వడియాలుగా పెట్టుకొని ఎండాక వేయించుకొని తింటే భలే రుచి. అయితే వడియాలను చీరల మీద చాపల మీద కాకుండా ప్లాస్టిక్ టేబుల్ క్లాత్ మీద కానీ పాలిథీన్ పేపర్ మీద కాని పెడితే ఎండాక తీసుకోవటం చాలా తేలిక.

4. పూరి పిండి కలిపేటప్పుడు కొంచెం చక్కెర కలిపితే చాలా సేపటి వరకు తాజాగా ఉంటాయి.

5. ఇడ్లీ పిండి రుబ్బేటప్పుడు రెండు ఆముదం చుక్కలు వేసి రుబ్బితే ఇడ్లీ మెత్తగా వస్తుంది.

6. నిలువుగా కోసిన ఉల్లిపాయ ముక్కల మీద మెత్తని ఉప్పు వేసి బాగా కలిపితే అవి తడి అవుతాయి. వాటిని కొంచెం శనగ పిండితో కలిపి    వేయించుకుంటే పకోడీలు కరకరలాడతాయి.