టీమిండియా స్టార్ బౌలర్ హర్భజన్ సింగ్ తండ్రి అయిన విషయాన్ని భజ్జీ ఇంకా ప్రకటించలేదు. అయితే భజ్జీ భార్య గీతా బాస్రా బుధవారం లండన్‌లోని ఆస్పత్రిలో ఆడపిల్లకు జన్మనిచ్చినట్లు హర్భజన్ తల్లి అవతార్ కౌర్ మీడియా ద్వారా వెల్లడించారు. తల్లీ బిడ్డ ఇద్దరూ ఆరోగ్యంగా ఉన్నారని పేర్కొన్నారు. ఈ సందర్భంగా తన కుమారుడు, కోడలికి శుభాకాంక్షలు తెలియజేసినట్లు చెప్పారు.
అయితే, తనకు కూతురు పుట్టిన శుభవార్తపై హర్భజన్ సింగ్ ఇంకా ఎలాంటి ప్రకటనా చేయలేదు. సాధారణంగా క్రికెట్ సెలెబ్రిటీలు తన వివాహం ఇతరత్రా శుభకార్యాలను వెంట వెంటనే సోషల్ మీడియాలో పోస్ట్ చేస్తారు. అయితే భజ్జీ మాత్రం తనకు ఆడబిడ్డ పుట్టి గంటలు గడిచినా ఎందుకు నోరెత్తట్లేదని ఫ్యాన్స్ ప్రశ్నిస్తున్నారు. కాగా హర్భజన్, గీతా బస్రాల వివాహం జలంధర్‌లో అక్టోబర్ 29, 2015న జరిగిన సంగతి తెలిసిందే.
