మీనరాశిలో పుట్టిన జాతకులు కనకపుష్యరాగం ధరించడం ద్వారా శుభఫలితాలు చేకూరుతాయని రత్నాల శాస్త్ర నిపుణులు చెబుతున్నారు. కనకపుష్యరాగం ధరించడం ద్వారా గురుగ్రహదోషాలు తొలగిపోతాయి. బలము, నూతనోత్సాహం, నేత్రజ్యోతి పెరుగుతుంది. టోపాజ్ అని పిలువబడే పుష్యరాగ రత్నాన్ని ధరించే మీనరాశి జాతకులకు ఈతిబాధలు తొలగిపోయి, సుఖసంతోషాలు చేకూరుతాయి. దయాహృదయులు, ధైర్యవంతులు, కష్టజీవులుగా ఉండే మీనరాశి జాతకులు పుష్యరాగం ధరిస్తే అష్టైశ్వర్యాలు చేకూరుతాయని రత్నాల శాస్త్ర నిపుణులు అంటున్నారు.
కనకపుష్యరాగం ఎలా ఉంటుందంటే..? పసుపు రంగును కలిగి ఉండే కనకపుష్యరాగంపై ఎటువంటి చారలు వుండవు. పుష్యరాగంలో కనకపుష్యరాగం, శ్వేత పుష్యరాగం అనే రెండు రకాలు కలవు. పుష్యరాగము ఎలా ఉంటుందంటే..? పారదర్శకము మరియు కాంతివంతముగా వుంటుంది. అసలైన కనకపుష్యరాగమును ఎండలో ఉంచితే వెలుగు వ్యాప్తి చెందుతుంది. పుష్యరాగమును చేతిలో తీసుకుంటే బరువుగా ఉంటుంది.
ఎలా ధరించాలంటే..? గురువారం సూర్యోదయానికి ధరించాలి. బంగారపు లోహములో పొదిగించి, కుడిచేతి చూపుడు వ్రేలుకు ధరించాలి. ముందుగా పాలులోగానీ, గంగాజలములో గానీ శుద్ధి చేయాలి. గురు ధ్యాన శ్లోకములు 160 మార్లు ధ్యానించి ధరించడం ద్వారా ఈతిబాధలు తొలగిపోయి, సకల సంపదలు చేకూరుతాయని రత్నాల శాస్త్రం చెబుతోంది.
ఇకపోతే.. మీనరాశిలో జన్మించిన జాతకులకు మూడు, ఏడు మరియు 12, 21, 30, 48, 57, 66, 75, 7, 16, 25, 34, 43, 52, 61, 70 అనే సంఖ్యలు కలిసొస్తాయి. వీటితో పాటు 1, 2, 9 అనే సంఖ్యలు కూడా సామాన్య ఫలితాలను ఇస్తాయి. అయితే 5, 6 అనే సంఖ్యలు మాత్రం కలిసిరావని సంఖ్యా శాస్త్ర నిపుణులు అంటున్నారు.
అలాగే మీనరాశి జాతకులకు ఎరుపు, పసుపు వంటివి అనుకూలిస్తాయి. ఈ రంగుల్లో దుస్తులు ధరించడం ద్వారా మనశ్శాంతి నెలకొంటుంది. ఇందులో పసుపు రంగు చేతి రుమాలును వాడటం ద్వారా శుభ ఫలితాలు చేకూరుతాయి.
మరోవైపు.. మీనరాశి జాతకులకు గురువారం శుభ ఫలితాలనిస్తుంది. గురువారం ప్రారంభించే పనులు దిగ్విజయంగా పూర్తవుతాయి. అలాగే ఆది, సోమవారాలు కూడా వీరికి అనుకూలిస్తాయి. కానీ బుధవారం మాత్రం ఈ రాశి జాతకులకు అంతగా కలిసిరావు. అలాగే మంగళవారంలో చేబదుళ్ళు తీసుకోవడం, ఇవ్వడం కూడదని జ్యోతిష్య నిపుణులు సూచిస్తున్నారు.
