భారత డిజైనర్లు హాలీవుడ్ స్థాయిలో రాణిస్తున్నారు. జెండాయా, సెలెనా గోమెజ్, గిగి హెడిడ్ వంటి అంతర్జాతీయ తారామణుల బాటలోనే ప్రముఖ హలీవుడ్ నటి బ్లేక్ లైవ్లీ కూడా భారతీయ ఫ్యాషన్ డిజైనర్ రాహుల్ మిశ్రా రూపొందించిన వస్త్రాలతో తళుక్కున మెరిశారు. హాలీవుడ్ తారలు వరుసగా అదిరిపోయే వస్త్రాలను ధరించడం భారతీయ డిజైనర్ల ప్రతిభకు నిదర్శనంగా చెప్పుకోవచ్చు.
ప్రస్తుతం తాను నటిస్తున్న 'అనదర్ సింపుల్ ఫేవర్' సినిమా ప్రచారం కార్యక్రమాల్లో బ్లేక్ లైవ్లీ చురుకుగా పాల్గొంటున్నారు. ఈ ప్రచారంలో భాగంగా, ఆమె రాహుల్ మిశ్రా స్ప్రింగ్ 2025 కౌచర్ కలెక్షన్‌కు చెందిన ఒక అద్భుతమైన నల్లటి పెన్సిల్ స్కర్టును ధరించారు. సిటీస్కేప్ పేరుతో రూపొందించిన ఈ స్కర్టుపై సున్నితమైన చేతి ఎంబ్రాయిడరీ రాహుల్ మిశ్రా ప్రత్యేకత అయిన 3డీ అలంకరణలు ఉన్నాయి.
ఈ స్కర్టుపై స్టైలింగ్‌ను బ్లేక్ లైవ్లీ స్వయంగా చేసుకోవడం విశేషం. స్కర్టుపై ఉన్న కళాత్మక ఎంబ్రాయిడరీ పనితనం స్పష్టంగా కనిపించేలా, దానికి జతగా ఆమె చాలా సింపుల్‌గా ఉండే బ్లాక్ ట్యాంకు టాప్‌ను ఎంచుకున్నారు. ఈ లుక్‌తో ఆమె అందరి దృష్టిని ఆకర్షించారు.
