కుక్కలు తమ యజమానుల పట్ల విశ్వాసం చూపుతాయి. అది వాటి సహజ లక్షణం. యజమానుల పట్ల విశ్వాసం చూపే పిల్లులు ఎక్కడైనా ఉంటాయా? లోకంలో అలాంటి పిల్లులు కూడా ఉంటాయని ఆశ్చర్యం కలుగుతుంది. అయితేనేం, ఫొటోలో కనిపిస్తున్న ఈ పిల్లిని మాత్రం విశ్వాసానికి మారుపేరుగా చెప్పుకోవచ్చు. విశ్వాస ప్రదర్శనలో దీని తీరు జాగిలాలకు సాటి వస్తుంది. అయితే, పాపం దీని యజమానులే దీని ప్రేమను నోచులేకపోయారు.
తనను పెంచిన యజమానురాలిపై ఈ పిల్లి చూపించిన ప్రేమ, విశ్వాసం చూస్తే ఎవ్వరికైనా గుండె బరువెక్కుతుంది. ఆ వివరాలను పరిశీలిస్తే... ఇండోనేషియా దేశంలోని సెంట్రల్ జావా ప్రాంతానికి చెందిన కుందరి అనే వృద్ధురాలు ఈ పిల్లిని పెంచుకుంది. వృద్ధాప్యం వల్ల కుందరి మరణించడంతో కుటుంబసభ్యులు ఆమె మృతదేహాన్ని శ్మశానవాటికలో ఖననం చేశారు. తన యజమానురాలిని ఖననం చేసిన సమాధి వద్దకు పిల్లి దాదాపు ఏడాది కాలంగా వెళ్తూ అక్కడే ఉంటోంది. శ్మశానవాటికకు సమీపంలో వచ్చిపోయేవారు ఆ పిల్లికి ఆహారం, నీరు అందించినా అది తీసుకోవడం లేదట.
ఇక్కడ విచిత్రం ఏమంటే ప్రతిరోజూ పిల్లి యజమానురాలి ఇంటికి వెళ్లి అక్కడ మృతురాలి పిల్లల్ని చూసి మళ్లీ సమాధి వద్దకు తిరిగొచ్చేస్తుందట. ఆ పిల్లిని తాను పెంచుకునేందుకు చూసినా యజమానురాలి సమాధి వీడి రావడం లేదని కెలి ప్రేట్నో చెప్పారు. తనను పెంచిన యజమానురాలిపై పిల్లి చూపిస్తున్న ప్రేమ, విశ్వాసం చూసి అందరూ ఆశ్చర్యపోతున్నారు.
