క‌రీబియ‌న్ దీవులు, క్యూబాను ముంచెత్తిన హ‌రికేన్ ఇర్మా.. ఇక అమెరికాలోని ఫ్లోరిడాలోని కీస్ వద్ద తీరం దాటింది. ఇర్మా తీరం దాటే స‌మ‌యంలో గంట‌కు 209 కిలోమీట‌ర్ల వేగంతో గాలులు వీచాయి. ఇర్మా తుఫాను అమెరికా చరిత్రలో కనీవినీ ఎరుగని బీభత్సం సృష్టించింది. ప్రజలు ప్రాణాలను అరచేతిలో పెట్టుకుని సురక్షిత ప్రాంతాలకు తరలి వెళ్లారు. ఇర్మా తుఫాను ధాటికి ఫ్లోరిడాలోని అనేక ప్రాంతాలు నేలమట్టమయ్యాయి. అలాగే, ద‌క్షిణ ఫ్లొరిడాలోని 4.2 ల‌క్ష‌ల ఇండ్ల‌కు విద్యుత్ స‌ర‌ఫ‌రా నిలిచిపోయింది. ఇర్మా తుఫాను ధాటికి ఇప్ప‌టి వ‌ర‌కు 20 మంది మృతి చెందారు. వెంటనే స‌హాయ‌క చ‌ర్య‌లను ప్రారంభించారు.
అయితే, ఇర్మా తుఫాను జైలు ఖైదీలకు ఎంతో మేలు చేసింది. ఏకంగా వందమందికిపైగా ఖైదీలకు విముక్తి ప్రసాదించింది. అట్లాంటిక్ సముద్రంలోని బ్రిటిష్ వర్జిన్ ఐలండ్స్‌లో ఉన్న జైలు పైభాగం ఇర్మా దెబ్బకు ధ్వంసమైంది. దీంతో దొరికిందే సందని సంబరపడిన ఖైదీలు వెంటనే జైలు నుంచి పరారయ్యారు. వారిని నిలువరించడం అక్కడి గార్డులకు కష్టతరంగా మారడంతో ఖైదీలు గోడదూకి పారిపోతుంటే జైలు సిబ్బంది చేష్టలుడిగి చూస్తుండిపోయారు.
