కరోనా వైరస్ సోకకుండా అడ్డుకునేందుకు వీలుగా కొన్ని ఫార్మా కంపెనీలు వ్యాక్సిన్లను అభివృద్ధి చేశాయి. ప్రస్తుతం భారత్‌లో కోవాగ్జిన్, కోవిషీల్డ్ వ్యాక్సిన్లు అందుబాటులోకి వచ్చాయి. అయితే, వీటి ధరల్లో తేడా వుంది. ఈ నేపథ్యంలో త్వరలోనే దేశానికి రానున్న రష్యాకు చెందిన స్పుత్నిక్ వి వ్యాక్సిన్ ఒక డోసు ధరను నిర్ణయించారు. ఈ ప్రకారంగా ఒక డోసు ధర రూ.995.40గా నిర్ణ‌యించిన‌ట్లు శుక్రవారం వెల్ల‌డించింది.
రష్యా నుంచి దిగుమతి చేసుకున్న టీకాల‌కు ఈ ధర ఉంటుంద‌ని, ఇండియాలో త‌యారయ్యే వాటికి త‌క్కువ ధర ఉండే అవ‌కాశం ఉంద‌ని ఈ వ్యాక్సిన్లను భారత్‌లోకి దిగుమతి చేస్తున్న డాక్టర్ రెడ్డిస్ ల్యాబ్ తెలిపింది. ఇప్ప‌టికే హైద‌రాబాద్‌లో ల్యాండైన ఈ టీకా ఎమ్మార్పీని రూ.948గా నిర్ణ‌యించ‌గా.. దానికి 5 శాతం జీఎస్టీ క‌లిపితే ధర రూ.995.40 అవుతుంది.
ఈ టీకా తొలి డోసును ఇప్ప‌టికే హైద‌రాబాద్ వ్య‌క్తికి వేసిన‌ట్లు రెడ్డీస్ ల్యాబ్ ఒక ప్రకటనలో తెలిపింది. ఈ నెల 1వ తేదీనే ల‌క్ష‌న్న‌ర స్పుత్నిక్ వి టీకాలు హైద‌రాబాద్‌లో దిగిన విష‌యం తెలిసిందే. వ‌చ్చే కొద్ది నెల‌ల్లో మ‌రిన్ని డోసులు దిగుమతి అవుతాయ‌ని, త్వరలోనే భారత్‌లోనూ ఈ వ్యాక్సిన్ తయారీ ప్రారంభిస్తామ‌ని రెడ్డీస్ ల్యాబ్ విడుదల చేసిన పత్రికా ప్రకటనలో పేర్కొంది.
