ప్రతి ఒక్కరూ తమ జీవితాంతం గుర్తుండిపోయేలా పెళ్లి జరగాలని కోరుకుంటారు. ఇందుకోసం పెళ్లికి ముందునుంచే అనేక ప్లాన్స్ వేసుకుంటుంటారు. అతిథులు, వారికి వడ్డించాల్సిన భోజనాలు, డెకరేషన్.. ఇలా ఒకటేమిటి... అన్నింటినీ ముందే ఊహించుకుని మురిసిపోతుంటారు. అలాగే, వివాహం జరిగే కళ్యాణం మండపాల వద్దకు కార్లు లేదా గుర్రాలు, గుర్రపుబగ్గీలపై వస్తారు.
కానీ, సౌదీలోని జౌఫ్ అనే ప్రాంతానికి చెందిన ఓ యువకుడు తన పెళ్లిని తనకే కాకుండా.. అందరికీ గుర్తుండిపోయేలా జరుపుకోవాలనుకున్నాడు. అనుకున్నదే తడవుగా కొత్తగా ఆలోచించాడు. పెళ్లి కొడుకు కోసం పెళ్లి వేదిక వద్ద స్నేహితులు బంధువులు అంతా ఎదురు చూస్తున్నారు. పెళ్లి కొడుకును పెళ్లి పందిరి వద్దకు తీసుకెళ్లేందుకు సమయం కావస్తోందని అందరూ ఆందోళన చెందుతున్నారు.
ఇంతలో ఉన్నట్టుండి ఓ కారు వచ్చి ఆగింది. దాంట్లో నుంచి వరుడు దిగుతాడనుకుంటే దిగలేదు. దీంతో అందరూ షాక్‌కు గురయ్యారు. ఆ తర్వాత మరో భారీ ట్రక్కు వచ్చి ఆగింది. దాంట్లో నుంచి పెళ్లి కొడుకు దిగడంతో అంతా అవాక్కయ్యారు. ఈ దృశ్యం చూడగానే ప్రతి ఒక్కరూ ఆశ్చర్యపోయారు. ఆ తర్వాత అంతా తేరుకుని సరదగా కాసేపు నవ్వుకున్నారు. దీనికి సంబంధించిన వీడియోను సోషల్ మీడియాలో వైరల్ అవుతోంది. మీరూ చూడండి.
