ప్రపంచ ప్రజలంతా ఆసక్తిగా ఎదురుచూస్తున్న తరుణం ఆసన్నమైంది. అవును.. ఆ ఇద్దరు కలుసుకోనున్నారు. వాళ్లిద్దరు ఎవరనేగా మీ సందేహం.. అయితే చదవండి మరి. అమెరికా అధ్యక్షుడు డొనాల్డ్ ట్రంప్, ఉత్తర కొరియా అధినేత కిమ్ జాంగ్ ఉన్ భేటీకి ముహూర్తం ఖరారైంది. ఈ భేటీకి సంబంధించి వైట్ హౌస్ తొలిసారి అధికారిక ప్రకటన విడుదల చేసింది.
సింగపూర్ వేదికగా ఈ నెల 12న ఉదయం 9 గంటలకు డొనాల్డ్ ట్రంప్- కిమ్ జాంగ్ ఉన్ సమావేశం ఉంటుందని వైట్ హౌస్ మీడియా కార్యదర్శి సారా శాండర్స్ వెల్లడించారు. ఈ సమావేశానికి అమెరికా నుంచి భద్రతా బలగాలు సింగపూర్ వెళతాయని, ముందురోజు రాత్రి 9 గంటల నుంచే సమావేశం ప్రాంతం తమ అధీనంలో ఉంటుందని శాండర్స్ తెలిపారు.
