అమెరికాలోని శాన్‌ఫ్రాన్సిస్కోలో ఓ విచిత్ర ఘటన ఒకటి జరిగింది. ఆస్టిన్‌కు వెళ్లేందుకు తన బిడ్డ, తల్లితో విమానాశ్రయానికి వచ్చిన ఓ మహిళా ప్రయాణికురాలు విమాన మహిళా సిబ్బందికి బోర్డింగ్ పాస్ ఇచ్చే క్రమంలో పొరపాటున థ్యాంక్యూ సర్ అంటూ ధన్యవాదాలు చెప్పింది. దీనిపై మహిళా సిబ్బంది ఆగ్రహం వ్యక్తం చేస్తూ వారిని ఆ మహిళా ప్రయాణికురాలిని విమానం ఎక్కకుండా అడ్డుకున్నారు.
ఈ వివరాలను పరిశీలిస్తే, టెక్సాస్‌కు చెందిన జెన్నా లాంగోరియా అనే మహిళ తన కుమారుడు, తల్లి కలిసి ఆస్టిన్ వెళ్లేందుకు విమానం టిక్కెట్లు బుక్ చేసుకున్నారు. శాన్‌ఫ్రాన్సిస్కోలో విమానం ఎక్కే సమయంలో సిబ్బందికి తమ బోర్డింగ్ పాస్ అందజేశారు. ఈ క్రమంలో జెన్నా.. మహిళా అటెండెంట్‌ను పురుషుడుగా పొరపాటుపడి థ్యాంక్యూ సర్ అని సంబోంధించింది. దీంతో తీవ్ర ఆగ్రహానికి గురైన ఆ సిబ్బంది... జెన్నాతో పాటు ఆమె తల్లి, కుమారుడిని కూడా లోపలకు వెళ్లకుండా అడ్డుకున్నారు.
ఈ క్రమంలో జెన్నా మరో సిబ్బంది సాయం కోరింది. తన తల్లి, కుమారుడిని గేటు వద్దే ఆయన ఆపేశారని ఫిర్యాదు చేసింది. ఆ అటెండెంట్ ఆయన కాదు ఆమె అని బదులిచ్చారు. తప్పు తెలుసుకున్న జెన్నా క్షమాపణలు చెప్పేందుకు ప్రయత్నించినా వినిపించుకోలేదు. తన ఆవేదనను నెట్టింట వెళ్లబోసుకున్న జెన్నా.. తనకు అన్యాయం జరిగిందని ఆవేదన వ్యక్తం చేసింది.
