ఈ హత్యకు సంబంధించి ముషార్రఫ్ తాజాగా తన ఫేస్‌బుక్ పేజీలో ఓ వీడియోను పోస్ట్ చేశారు. బెనజీర్ మృతికి కారణం పాకిస్థాన్ పీపుల్స్ పార్టీ అధినేత అసిఫ్ జర్దారీ అని తన మెసేజ్‌లో పర్వేజ్ ఆరోపించారు. బెనజీర్ హత్య వెనుక తన పాత్ర ఉందని జర్దారీ ఆరోపిస్తున్నారని, అందుకే ఈ ప్రకటన చేయాల్సి వస్తుందని ఆయన వెల్లడించారు.
కాగా, బెనజీర్ కేసులో ఇటీవల యాంటీ టెర్రరిజం కోర్టు తీర్పును వెలువరించింది. ఆ కేసులో పర్వేజ్‌పై ఆరోపణలు వచ్చాయి. దీంతో ముషర్రఫ్ ఈ ప్రకటన చేశారు. బెనజీర్ హత్యకు కారణమైన మరో ఇద్దరు పోలీస్ ఆఫీసర్లను ఎవరూ పట్టించుకోలేదని పర్వేజ్ తెలిపారు. బెనజీర్ కుటుంబంతో పాటు సింధు, పాకిస్థాన్ ప్రజలకు ఈ విషయం తెలియాలన్న ఉద్దేశంతో ఈ వీడియోను పోస్ట్ చేస్తున్నట్లు పర్వేజ్ తెలిపారు. భుట్టో హత్య గురించి తెలుసుకోవాలనుకుంటున్న ప్రతి ఒక్కరికీ ఈ సందేశం వర్తిస్తుందన్నారు.
