ఇండియన్ ప్రీమియర్ లీగ్ (ఐపీఎల్)లో 50 సార్లు 50కిపైగా పరుగులు చేసిన తొలి బ్యాట్స్‌మన్‌గా రికార్డులకెక్కాడు. గురువారం రాత్రి కింగ్స్ ఎలెవన్ పంజాబ్‌తో జరిగిన మ్యాచ్‌లో వార్నర్ 40 బంతుల్లో 5 ఫోర్లు, సిక్సర్‌తో 52 పరుగులు చేశాడు. ఈ మ్యాచ్‌లో హైదరాబాద్ 69 పరుగుల తేడాతో ఘన విజయం సాధించింది.
ఐపీఎల్ టోర్నీలో డేవిడ్ వార్నర్ గత 2009 నుంచి క్రమం తప్పకుండా ఆడుతున్నారు. పైగా, అత్యధిక పరుగులు చేసిన ఆటగాడిగా మూడు సీజన్లలో ఆరెంజ్ క్యాప్ అందుకున్నాడు. బాల్ ట్యాంపరింగ్ వివాదం కారణంగా 2018లో సీజన్‌లో ఐపీఎల్‌కు దూరమయ్యాడు.
పంజాబ్‌పై వార్నర్‌కు ఇది 9వ అర్థ సెంచరీ కావడం గమనార్హం. వార్నర్ ఐపీఎల్‌లో ఇప్పటివరకు 46 అర్థ సెంచరీలు నమోదు చేయగా, నాలుగు సెంచరీలు ఉన్నాయి. వార్నర్ తర్వాత ఈ జాబితాలో బెంగళూరు సారథి విరాట్ కోహ్లీ ఉన్నాడు.
కోహ్లీ 42సార్లు 50కిపైగా పరుగులు చేశాడు. రోహిత్ శర్మ, సురేశ్ రైనాలు 39 సార్లు ఈ ఘనత సాధించగా, డివిలియర్స్ 38సార్లు 50కిపైగా పరుగులు చేసి ఆ తర్వాతి స్థానంలో ఉన్నాడు.
