ఇండియన్ ప్రీమియర్ లీగ్ 2021 సీజన్లో చెన్నై సూపర్ కింగ్స్ జట్టు బోణి కొట్టింది. పంజాబ్‌ కింగ్స్‌పై 6 వికెట్ల తేడాతో ఘన విజయం సాధించింది. పేసర్‌ దీపక్‌ చాహర్‌ (4/13) పవర్‌ప్లేలో నిప్పులు చెరిగే బంతులు వేయటంతో పంజాబ్‌ కింగ్స్ పనైపోయింది. స్వింగ్‌ బౌలర్‌ దీపక్‌ చాహర్‌ (4/13) అద్వితీయ ప్రదర్శనతో చెలరేగిన వేళ.. పంజాబ్‌ కింగ్స్ 107/8 పరుగులకే పరిమితమైంది. పంజాబ్‌ కింగ్స్‌పై విజయంతో సీజన్లో సూపర్‌కింగ్స్‌ తొలి విజయాన్ని తన ఖాతాలో వేసుకుంది.
26/5తో కష్టాల్లో పడిన పంజాబ్‌ను షారుక్‌ ఖాన్‌ (47, 36 బంతుల్లో 4 ఫోర్లు, 2 సిక్స్‌లు) ఆదుకున్నాడు. స్వల్ప ఛేదనలో మోయిన్‌ అలీ (46, 31 బంతుల్లో 7 ఫోర్లు, 1 సిక్స్‌) చెలరేగాడు. ఓపెనర్‌ డుప్లెసిస్‌ (36 నాటౌట్‌, 33 బంతుల్లో 3 ఫోర్లు, 1 సిక్స్‌) ఛేదనలో బాధ్యతాయుత ఇన్నింగ్స్‌తో ఆకట్టుకున్నాడు. పంజాబ్‌ పేసర్‌ మహ్మద్‌ షమి రెండు వికెట్లతో మెరిశాడు. అయినా పంజాబ్‌ను గెలుపు వరించలేదు.
గైక్వాడ్‌ నిష్క్రమణతో సూపర్‌కింగ్స్‌ ఇన్నింగ్స్‌ స్వరూపమే మారిపోయింది. పించ్‌ హిట్టర్‌ మోయిన్‌ అలీ ధనాధన్‌ ఇన్నింగ్స్‌తో కదంతొక్కాడు. ఏడు ఫోర్లు, ఓ సిక్సర్‌తో చెన్నైకి గెలుపు గీతకు చేరువ చేశాడు. సురేశ్‌ రైనా (8), రాయుడు (0)లు వరుస బంతుల్లో నిష్క్రమించినా శామ్‌ కరన్‌ తోడుగా ఓపెనర్‌ డుప్లెసిస్‌ లాంఛనం ముగించాడు.
