మేకిన్ ఇండియా ప్రభావంతో ఉపాధి అవకాశాలు మెరుగైనాయి. ఇందులో భాగంగా 2017 ఏడాది టెలికాం రంగంలో మాత్రం 2 మిలియన్ల కొత్త ఉద్యోగాలు రానున్నాయని టెలికామ్ రంగ స్కిల్ కౌన్సిల్‌తో కలిసి టీమ్‌లీజ్‌ నిర్వహించిన అధ్యయనంలో వెల్లడైంది. ప్రభుత్వం చేపడుతున్న 'మేకిన్ ఇండియా' కార్యక్రమంలో భాగంగా కొత్త సర్వీస్ ప్రొవైడర్లు రానున్నాయని, ఇవి ఉద్యోగాల సృష్టికి కారణమవుతాయని ఆ అధ్యయనం ద్వారా వెల్లడి అయ్యింది.
మొబైల్ హ్యాండ్‌సెట్‌లను తయారు చేసేవారు(1.76మిలియన్లు), అందుకు అనుగుణంగా సేవలను అందించేందుకు సర్వీస్ ప్రొవైడర్లు(0.37మిలియన్లు) కావాల్సి ఉంటుంది. ఇక 5జీ టెక్నాలజీ అందుబాటులోకి రానున్న నేపథ్యంలో భవిష్యత్‌లో మౌలికరంగంలో కూడా అవకాశాలు వస్తాయని నివేదికలో వెల్లడైంది.
2020-21 నాటికి మౌలికరంగంలో 0.92 మిలియన్ల ఉద్యోగాలు అవసరమవుతాయని, మొత్తంగా చూస్తే ఈ రంగంలో శ్రామికుల సంఖ్య 2021 నాటికి 8.7 మిలియన్లకు చేరనుందని టీమ్‌ లీజ్‌ సర్వీసెస్‌ సీనియర్‌ ఉపాధ్యక్షుడు నీతి శర్మ తెలిపారు.
