ప్రపంచవ్యాప్తంగా అమ్మాయిల ఆటబొమ్మ అయిన బార్బీకి సోమవారం నాటితో యాభై సంవత్సరాలు పూర్తయ్యాయి. గడచిన యాభై ఏళ్లలో బార్బీ బొమ్మ వివిధ రూపాలలో, వినూత్న ఆహార్యాలతో పిల్లలను అలరించిన సంగతి విదితమే.
1959వ సంవత్సరం మార్చి 9వ తేదీన జరిగిన ఓ ఆటబొమ్మల ప్రదర్శనలో బార్బీ బొమ్మ ప్రపంచానికి పరిచయమైంది. ఆ తరువాత అనతికాలంలోనే ఈ బొమ్మ ప్రపంచ దేశాలన్నింటికీ పాకింది. బార్బీ అసలు పేరు బార్బీ మిలిసెంట్ రాబర్ట్స్. జర్మనీ దేశానికి చెందిన "బిల్డ్ లిలీ" అనే బొమ్మ దీనికి మాతృక.
బిల్డ్ లిలీ బొమ్మను చూసిన న్యూయార్క్‌కు చెందిన ఓ మహిళా వ్యాపారవేత్త ఈ బార్బీ బొమ్మకు రూపకల్పన చేశారు. ఇప్పుడు ఈ బొమ్మ అనేకమైన ఆధునిక పోకడలకు అనుగుణంగా రూపాంతరం చెందుతూ... ప్రపంచదేశాల పిల్లలను, పెద్దవారిని సైతం విశేషంగా అలరిస్తోంది.
