కర్ణాటకలో దారుణం వెలుగుచూసింది. తోటలోని కొబ్బరి చెట్టు ఎక్కి కొబ్బరి బోండాం తాగాడన్న కసితో ముగ్గురు యువకులు 8 ఏళ్ళ బాలుడిపై అత్యంత పైశాచికంగా దాడికి పాల్పడ్డారు. ఇకపై అలాంటి పని చేయను.. తనను వదిలేయాలని కాళ్లావేళ్లాపడి ప్రాధేయపడినా వాళ్ల మనసు కరగలేదు. ఇందుకు సంబంధించిన వీడియో వైరల్‌గా మారింది. ఆ వివరాలను పరిశీలిస్తే...
సెప్టెంబర్‌ 29న హాసన జిల్లా అరసికెరె తాలూకాలోని ఓ తోటలో ఎనిమిదేళ్ల కుర్రాడు కొబ్బరిచెట్టెక్కి ఓ కాయను కోచి.. అందులోని నీటిని తాగాడు.ఆ బాలుడు నీళ్లు తాగడాన్ని ముగ్గురు యువకులు చూశారు. దీంతో బాలుడ్ని టార్చర్ చేయడం మొదలుపెట్టారు. చీమలపుట్ట మధ్యలోవున్న స్టోన్ పిల్లర్‌పై నిలబెట్టి చిత్ర హింసలు పెట్టారు. చీమలు కుడుతున్నాయని, తనను వదిలేయాలని ప్రాధేయపడినా మనసు కరగలేదు.
పైగా తాళ్లు, కర్రెలతో బాలుడిని గొడ్డును బాదినట్టు బాదారు. ఈ తతంగాన్నిఅటుగా వెళ్తున్న ఓ వ్యక్తి తన సెల్‌ఫోన్ కెమెరాలో బంధించి సోషల్ మీడియాలో పోస్ట్ చేశాడు. ఈ విషయం బాలుడి బంధువులకు తెలియడంతో వాళ్లపై ఫిర్యాదు చేశారు. వెంటనే కేసు నమోదు చేసిన పోలీసులు ముగ్గురు యువకుల్ని అదుపులోకి తీసుకున్నారు. బాలుడిని అత్యంత కిరాతకంగా హింసించిన ఈ యువకుల్ని కఠినంగా శిక్షించాలని స్థానికులు డిమాండ్‌ చేస్తున్నారు. ప్రస్తుతం ఈ వీడియో సోషల్ మీడియాలో వైరల్‌గా మారింది.
