వరుడు పెళ్ళి రోజున కూడా గుట్కా నములుతూ అందరినీ పలకరించాడనే కారణంతో వధువు పెళ్లి రద్దు చేసుకున్న ఘటన యూపీలోని బలియా జిల్లా మురార్ పట్టే ప్రాంతంలో చోటుచేసుకుంది. వివరాల్లోకి వెళితే.. మురార్ పట్టే ప్రాంతానికి చెందిన 21 ఏళ్ల యువతికి బాలాసింగ్ అనే వ్యక్తితో నిశ్చయమైంది. మంగళవారం రాత్రి బాలాసింగ్ తన కుటుంబ సభ్యులు, బంధువులతో కలిసి మురార్ పట్టేప్రాంతానికి పెళ్లికోసం చేరుకున్నారు.
వధువు కుటుంబ సభ్యులు ఏర్పాటు చేసిన రిసెప్షన్ వేదిక మీదకు బాలాసింగ్ వెళ్లాడు. వధువు సైతం వరుడు బాలాసింగ్ పక్కన వచ్చి నిలబడింది. ఆ సందర్భంలో బాలాసింగ్ నోటి నిండా గుట్కా వేసుకుని దర్శనం ఇచ్చాడు. అదే నోటితో అందరినీ పలకరిస్తున్నాడు. దీన్ని గమనించిన వధువు.. నీవు గుట్కా వేసుకుంటావా? అని అడిగింది. అందుకు వరుడు అవునని సమాధానం ఇచ్చాడు.
అంతే వధువుకు మండిపోయింది. గుట్కాలు తినే వ్యక్తిని, మందు తాగే మనిషిని నేను వివాహం చేసుకోనని చెప్పి రిసెప్షన్ వేదిక మీద నుంచి కిందకు దిగేసింది. పెద్దలు నచ్చచెప్పినా ఆమె మాట వినలేదు. తాను గుట్కా తినడం మానేస్తానని వరుడు కూడా హామీ ఇచ్చాడు. అయినా ఒంటికాలిపై నిలబడిన వధువు పెళ్ళి రద్దు చేసుకుంది. ఎవ్వరూ చెప్పినా, పంచాయతీ పెట్టినా, పోలీసులు నచ్చజెప్పినా వినలేదు. చివరికి వరుడు గుట్కా నములుతూ సొంతూరికి వెళ్ళిపోయాడు.
