తన దత్త పుత్రికగా చెప్పుకుంటున్న ప్రియాంక తనేజా అలియాస్ హనీప్రీత్ ఇన్సాన్‌ను తనతోపాటు జైలులో ఉండనివ్వాలని గుర్మీత్ రామ్ రహీం సింగ్ కోర్టులో కూడా పిటిషన్ దాఖలు చేశారు. హనీప్రీత్ తన ఫిజియోథెరపిస్ట్, ఒళ్లు మర్దన చేసే పరిచారిక అని, తన ఆరోగ్యం రీత్యా ఆమెను తనతోనే ఉండనివ్వాలని కోరాడు. అయితే గుర్మీత్‌ను తప్పించేందుకు కుట్ర చేసిన హనీప్రీత్ పరారీలో ఉన్నారని పోలీసులు చెప్పారు.
ఇదిలావుండగా, సిర్సాలోని డేరా సచ్చా సౌధా ప్రధాన కార్యాలయంపై పోలీసులు సోమవారం దాడి చేసి భారీ స్థాయిలో ఆయుధాలు స్వాధీనం చేసుకున్నారు. డేరా అధిపతి గుర్మీత్ అరెస్టు అనంతరం హింసను రెచ్చగొట్టేందుకు ఆయన అనుచరులు ఈ ఆయుధాలను ఉపయోగించినట్టు అనుమానాలు వ్యక్తమవుతున్నాయి. మొత్తం 33 ఆయుధాల్లో రైఫిళ్లు, పిస్తోళ్లు ఉన్నాయని తెలిపారు. అలాగే, ఇటీవల పంచకులలో హింసకు పాల్పడిన గుర్మీత్ అనుచరుడొకరు అంబాలా సెంట్రల్ జైలులో ఆత్మహత్యకు పాల్పడ్డాడు.
