'బిడ్డా.. తిరిగిరా! కలిసి కలో గంజో తాగుదాం.. చెడు సోపతులు నీకొద్దు నాయనా..'

అమ్మ పిలుపుతో ఆ ఉగ్రవాది చలించిపోయాడు. కన్నపేగు బంధానికి తలవంచారు. బిడ్డా అంటూ ఆ చేసిన వేడుకోలుతో కరుడుగట్టిన ఉగ్రవాదిగా మారిన ఆ యువకుడు సాధారణ పౌరుడిగా మారాడు. ఫలితంగా జనజీవన స్రవంతిలో కలిసిపోయాడు. జమ్మూకాశ్మీర్ రాష్ట్రంలో వెలుగు చూసిన ఈ ఘటన వివరాలను పరిశీలిస్తే, 

జమ్మూకాశ్మీర్‌లో ఎందరో చిన్నతనంలోనే ఉగ్రవాదానికి ఆకర్షితులై సంఘవిద్రోహ చర్యలకు పాల్పడుతున్నారు. ఇదే క్రమంలో ఓ మారుమూల ప్రాంతానికి చెందిన యువకుడు కొన్నాళ్ల క్రితం ఉగ్రవాదుల్లో చేరిపోయాడు. కొడుకును తన చెంతకు చేర్చాలని ఇటీవల అతడి తల్లి మీడియా ముందుకు వచ్చింది. 

'బిడ్డా.. తిరిగిరా! కలిసి కలో గంజో తాగుదాం. చెడు సోపతులు నీకొద్దు నాయనా..' అని ఆ అమ్మ వేడుకోవడంతో చలించిపోయిన యువకుడు ఉగ్రవాదాన్ని విడిచిపెట్టి జనజీవన స్రవంతిలోకి వచ్చాడు. 

తల్లి ఆవేదనను అర్థం చేసుకున్న ఆ యువకుడు శుక్రవారం పోలీసుల ఎదుట లొంగిపోయాడు. అమ్మ కోసం తాను ఉగ్రకార్యకలాపాలు శాశ్వతంగా విడిచిపెడుతున్నట్లు ప్రమాణం చేశాడు. భద్రతా కారణాల దృష్ట్యా అతడి వివరాలను వెల్లడించడం లేదని రాష్ట్ర డీజీపీ ఎస్‌పీ వేద్‌ ట్విట్టర్‌లో తెలిపారు.