తాజాగా వెలుగులోకి వచ్చిన ఈ వివరాలను పరిశీలిస్తే, ముంబై మహానగరంలోని సకినాక ప్రాంత ఖైరాని రోడ్డుకు చెందిన 32 ఏళ్ల బాధిత మహిళ నివసిస్తుంది. ఈ మహిళపై కన్నేసిన ఓ కామాంధుడు ఆమెపై లైంగికదాడికి తెగబడ్డాడు. దీంతో ఆ మహిళ అపస్మారక స్థితిలోకి జారుకుంది.
అయితే, ఓ మహిళ రక్తపు మడుగులో పడి ఉందని తెల్లవారుజామున 3.30 గంటల ప్రాంతంలో కంట్రోల్ రూముకు ఫోన్ వచ్చినట్టు పోలీసులు తెలిపారు. వెంటనే ఆ ప్రాంతానికి చేరుకున్న పోలీసులు బాధిత మహిళను ఘట్కోపర్‌లోని రాజావాడి ఆసుపత్రికి తరలించారు. ఆమె పరిస్థితి విషమంగా ఉందని పోలీసులు తెలిపారు. ప్రధాన నిందితుడిని అదుపులోకి తీసుకున్న పోలీసులు కేసు దర్యాప్తు ప్రారంభించారు.
ఈ దారుణానికి తెగబడిన వ్యక్తిని పోలీసులు అరెస్ట్ చేశారు. ఈ ఘటనలో మరికొందరి ప్రమేయం ఉండి ఉంటుందని పోలీసులు భావిస్తున్నారు. సమాచారం తెలుసుకున్న వెంటనే డీసీపీ, అడిషనల్ కమిషనర్ ఘటనా స్థలానికి చేరుకుని పరిసర ప్రాంతాలను పరిశీలించారు.
