తిరుచ్చి జిల్లాలోని పిచ్చాండవర్‌ కోవిల్‌ ప్రాంతానికి చెందిన డిగ్రీ విద్యార్థిని మోనికా(21), అదే ప్రాంతానికి చెందిన బాలా (అలియాస్‌) బాలమురుగన్‌(26) రెండేళ్ల క్రితం ప్రేమించుకున్నారు. దీనిపై మోనికా తల్లిదండ్రులు మందలించడంతో అప్పట్లో ఇద్దరూ విషం తాగి ఆత్మహత్యకు ప్రయత్నించారు. ఇది గుర్తించి పెద్దవాళ్లు రక్షించారు. అనంతరం మోనికా చదువుపై దృష్టిసారించింది. అయినా బాలా వెంటపడుతుండడంతో ఇటీవల మందలించింది.
దీంతో ఆగ్రహానికి గురైన బాలా బుధవారం విషం తాగి.. కళాశాల నుంచి ఇంటికి వెళుతున్న మోనికాను అడ్డుకున్నాడు. తాను విషం తాగిన విషయం చెప్పి.. నువ్వు కూడా జీవించరాదంటూ వెంట తెచ్చుకున్న కత్తితో ఆమెపై దాడి చేసి స్పృహ కోల్పోయాడు. తీవ్రంగా గాయపడిన మోనికాను, స్పృహ కోల్పోయిన బాలాను స్థానికులు ప్రభుత్వాస్పత్రికి తరలించారు. ప్రస్తుతం వారిద్దరూ చికిత్స పొందుతున్నారు. మోనికా తండ్రి రవి హెడ్‌ కానిస్టేబుల్‌ కాగా, తల్లి ఫాతిమా సబ్‌ ఇన్‌స్పెక్టర్‌గా సేవలందిస్తున్నారు. దీనిపై స్థానిక పోలీసులు కేసు నమోదు చేసి దర్యాప్తు జరుపుతున్నారు.
