వీధి కుక్క కరిచిందనీ తుపాకీతో కాల్చిపారేసిన ఎస్ఐ...

ఇటీవలి కాలంలో శునకాలపై ప్రతాపం చూపించే వారి సంఖ్య అధికమైంది. మొన్నటికిమొన్న చెన్నైలో ఇద్దరు మెడికోలు ఓ కుక్కను బహుళ అంతస్తు భవనంపై నుంచి కిందికి విసిరి దాన్ని వీడియో తీస్తూ పైశాచికానందం పొందారు. ఆ తర్వాత మరో ప్రాంతంలో ఇద్దరు యువకులు ఓ కుక్క కాళ్లు పట్టుకుని గిరగిరా తిప్పి నేలకేసి కొట్టారు. 

ఈ రెండు సంఘటనలు మరువకముందే ప్రజలకు రక్షణ కల్పించాల్సిన ఓ పోలీసు అధికారి ఆగ్రహానికి ఓ శునకరాజా బలైంది. కాలు కరవడంతో ఆగ్రహానికి గురైన ఎస్ఐ... దానిని కాల్చిపారేశాడు. ఈ సంఘటన ఉత్తరప్రదేశ్ రాష్ట్రంలోని చిన్హట్‌లో జరిగింది. 

చిన్హట్‌కు చెందిన ఎస్ఐ మహేంద్ర ప్రతాప్ బరాబంకీలో విధులను నిర్వహిస్తున్నాడు. ఈ సమయంలో అతడిని ఒక వీధి కుక్క కరిచింది. అంతే, రెచ్చిపోయిన ఆయన తన ఇంట్లో ఉన్న లైసెన్స్‌డ్ తుపాకీని తీసుకువచ్చి ఆ కుక్కను కాల్చిపారేశాడు. అయితే, ఈ సంఘటనపై జంతు ప్రేమికులు, జంతు హక్కుల ఉద్యమకారులు మండిపడుతున్నారు.