అగ్రహీరో విజయ్‌తో పుదుచ్చేరి ముఖ్యమంత్రి ఎన్.రంగస్వామి సమావేశమయ్యారు. రెండు రోజుల క్రితం ఈ భేటీ జరిగింది. చెన్నైనగర శివారు ప్రాంతమైన పనైయూరులో ఉన్న హీరో విజయ్ నివాసంలో ఈ భేటీ జరిగింది. విజయ్ ఇంటికి పుదుచ్చేరి ముఖ్యమంత్రి రంగస్వామి స్వయంగా వెళ్లి సమావేశం కావడం చర్చనీయాంశంగా మారింది. ఈ భేటీ సమయంలో విజయ్ అభిమానుల సంఘం అఖిల భారత అధ్యక్షుడు బుస్సీ ఆనందం కూడా ఉన్నారు.
కాగా, తమిళనాడు రాష్ట్రంలో నగర, పురపాలక ఎన్నికలకు త్వరలో పోలింగ్ జరుగనున్నాయి. ఈ ఎన్నికల్లో విజయ్ మక్కల్ ఇయ్యక్కం తరపున అభ్యర్థులు పోటీ చేస్తున్నారు. గతంలో జరిగిన పంచాయతీ ఎన్నికల్లో ఈ సంస్థ తరపున పోటీ చేసిన అనేక మంది అభ్యర్థులు విజయం సాధించారు. ఇపుడు మరోమారు బరిలోకి నిలిచారు.
అదేసమయంలో పుదుచ్చేరిలో భారతీయ జనతా పార్టీతో కలిసి ప్రభుత్వాన్ని ఏర్పాటు చేసిన ఎన్.రంగస్వామి తీవ్ర నిరాశలో కూరుకునిపోయివున్నారు. పేరుకు మాత్రమే సీఎంగా ఉన్నారే, పెత్తనం మాత్రం బీజేపీ కొనసాగుతోంది. ఇలాంటి తరుణంలో బీజేపీని తీవ్రంగా వ్యతిరేకించే విజయ్‌తో సీఎం రంగస్వామి భేటీ కావడం ఇపుడు పుదుచ్చేరి, తమిళనాడు రాష్ట్ర రాజకీయాల్లో చర్చనీయాంశంగా మారింది.
