వైశాఖ పౌర్ణమి మే 22వ తేదీ సాయంత్రం 5.42 గంటలకు ప్రారంభమై మరుసటి రోజు మే 23వ తేదీ సాయంత్రం 6.42 గంటలకు ముగుస్తుంది. తిథి వ్రతం మే 23న మాత్రమే ఆచరిస్తారు. ఈ రోజున శ్రీయంత్రం, బుద్ధుని విగ్రహం, ఇత్తడి ఏనుగు విగ్రహం ఇంటికి తెచ్చుకోవడం ద్వారా సర్వాభీష్టాలు చేకూరుతాయి. ఈ రోజు ఇంట్లో బంగారు లేదా వెండి నాణేలను ఉంచడం కూడా శుభప్రదంగా భావిస్తారు. తద్వారా లక్ష్మీదేవికి సంతోషం కలిగి, అనుగ్రహిస్తుందని పండితులు చెబుతున్నారు.
వైశాఖ పూర్ణిమ నాడు ఉపవాసం ఉండడం వల్ల అదృష్టం మరియు ఆరోగ్యం చేకూరుతుందని నమ్ముతారు. ఈ రోజున, విష్ణువు యొక్క అనుగ్రహం పొందడానికి సత్య నారాయణ పూజను నిర్వహిస్తారు. అదనంగా, భక్తులు ఈ రోజు ధర్మరాజును కూడా పూజిస్తారు.
శ్రీకృష్ణుడు తన స్నేహితుడైన సుదామను వైశాఖ పూర్ణిమ నాడు ఉపవాసం పాటించమని చెప్పినట్లు విశ్వాసం. తద్వారా సంపదను పొందాడని నమ్మకం. ఈ రోజున బ్రాహ్మణుడికి నీటితో నింపిన కుండను దానం చేస్తారు. కొందరు వైశాఖ పూర్ణిమ నాడు పంచదార, నువ్వులు దానం చేస్తే పాపాలు హరించుకుపోతాయని పండితులు అంటున్నారు.
