తెలంగాణ అసెంబ్లీ లాబీల్లో ఓ ఆసక్తికర చర్చ సాగుతోంది. 'బాహుబలి' పాత్రలను రాజకీయ నేతలకు అన్వయిస్తున్నారు. ముఖ్యంగా కేసీఆర్‌ను కట్టప్పతో కాంగ్రెస్ సీనియర్ నేత కె.జనారెడ్డి పోల్చగా, కేసీఆర్ కట్టప్ప కాదనీ భల్లాలదేవుడంటూ మరో సీనియర్ నేత మల్లు భట్టివిక్రమార్క చెప్పుకొచ్చారు.
అయితే, సీనియర్ మహిళా నేత, మాజీ మంత్రి డీకే అరుణ మాత్రం అడుగు ముందుకేసి.. కేసీఆర్‌ను ఓడించేందుకు మాలో ఎవరో ఒకరు 'బాహుబలి'గా మారుతారంటూ ఆసక్తికర వ్యాఖ్యలు చేశారు. శనివారం అసెంబ్లీ లాబీలో చిట్‌చాట్ కార్యక్రమంలో డీకే అరుణ మాట్లాడారు. 'బాహుబలి-1' చిత్రంలోని కట్టప్పను పోలుస్తూ కేసీఆర్‌పై తీవ్రంగా ఫైరయ్యాయరు.
'కేసీఆర్ కట్టప్ప.. బాహుబలి-1లో వెన్నుపోటు పొడిచింది ఆయనే' అని అన్నారు. 'బాహుబలి -1 పని అయిపోయింది. ఇప్పుడు నడుస్తున్నది బాహుబలి-2' అని ఆమె అన్నారు. కేసీఆర్‌ను ఓడించేందుకు మాలో ఒకరం బాహుబలి అవుతామని డీకీ అరుణ అన్నారు. నిన్న (శుక్రవారం) అసెంబ్లీలో జానారెడ్డిగారు చెప్పింది కూడా ఇదేనని ఆమె గుర్తు చేశారు. కానీ, మల్లు భట్టివిక్రమార్క మాత్రం.. కేసీఆర్ కట్టప్ప కాదనీ భల్లాలదేవుడంటూ వ్యాఖ్యానించారు.
